Таатта улууһун Дьохсоҕон нэһилиэгэр улуу бэйиэт, прозаик, драматург А.И.Софронов — Алампа төрөөбүтэ 130 сылынан «Алампалаах буоламмыт» диэн куонкурус буолла. Тэрээһини Дьохсоҕон нэһилиэгин бибилэтиэкэтрэ Галина Другина көҕүлээтэ. Улуус уонна Боробул бөһүөлэгин дьаһалталара, улуус култуураҕа управлениета, Алампа аатын сүгэр КСК өйөөн күүс-көмө буоллулар.
— Алампа аатын үйэтитэр сыаллаах-соруктаах куонкуруспутугар дьон-сэргэ көхтөөхтүк кытынна. Биэс ый устатата салҕаммыт тэрээһиҥҥэ улуустартан 86 киһи 93 үлэтэ киирдэ. Саамай кырдьаҕас күрэстэһээччи 84 саастаах Иван Бочонин (Таатта, Дьохсоҕон), саамай эдэр кыттааччыларбыт Кэбээйи Мукучутуттан үһүс кылаас оҕолоро: Анита Иванова, Ангелина Стрекаловская, Маиза Егорова. Салайааччылара Светлана Самсонова. Үлэлэри «Уран тыл» литературнай түмсүү чилиэнэ Алексей Кулаковскай салайааччылаах дьүүллүүр сүбэ көрдө, сыаналаата, — диэн иһитиннэрдэ Галина Другина. Кини куонкуруска пьесалар, сэһэннэр, кэпсээннэр, хоһооннор, поэма, тылбаас, оһуохай киллэриллибиттэрин эттэ. Итиэннэ бу тэрээһин ситимнэнэн сыл аайы ыытылларыгар баҕарарын, бастыҥ үлэлэринэн кинигэ бэчээттэтэр былааннаахтарын иһитиннэрдэ.
Оҕолорго Наташа Уварова (Таатта Ытык-Күөл), Санаайа Дмитриева (Нам), Иванна Иванова (Сунтаар, Түбэй Дьаархан ), Айнура Татаринова (Таатта, Дьохсоҕон) кыайыылаахтарынан тахсыбыттар.
Эдэр ыччакка Варвара Егорова-Чэмэлиинэ (Нам, Көбөкөн), Надежда Николаева-Күн Арылы (Горнай, Бэрдьигэстээх), Марфа Птицына (Мэҥэ Хаҥалас, Майа).
Орто саастаахтарга Мария Сивцева (Таатта, Дьохсоҕон), Елена Антонова-Күн Сиккиэрэ (Сунтаар, Аллыҥа), Родион Данилов-Ородьумаан (Өлүөхүмэ, Кыыллаах Арыы), Гизелла Попова (Таатта, Игидэй).
Аҕам саастаахтарга Светлана Самсонова-Сиибиктэ (Кэбээйи, Мукучу), Светлана Винокурова (Томпо, Мэҥэ Алдан), Мария Лопатырева-Сайылык Кыыһа (Таатта, Дьохсоҕон), Иван Бочонин (Таатта, Дьохсоҕон) ааттаммыттар. Биһирэбил бириистэргэ 71 саастаах Панкратий Петров «Үргүөрдээх үйэ үтүргэннэрин уҥуордаан. Биллибэт-көстүбэт докумуоннар туоһулара» диэн хос эһэтэ И.П.Шадрин, хос эбэтэ А.И.Скрябина-Шадрина архыыптарыгар харалла сыппыт Алампаҕа сыһыаннаах матырыйааллартан быһа тардыыларынан (Дьокуускай), Татьяна Петрова (Амма, Болугур) тылбааһынан, Валентина Харайданова (Таатта, Дьохсоҕон) Алампаҕа аналлаах оһуохайынан тиксибиттэр.
Бириистэри улуус тэрилтэлэрэ, биһирэбил бириистэри Дьохсоҕон дьаһалтата олохтобуттар. Кыайыылаахтары эҕэрдэлээһин сэтинньи 19 күнүгэр «Тулаҕын киэргэтэр туллуктар» диэн Алампа айымньыларынан ыччакка аналлаах хоһоон, ырыа улуустааҕы куонкуруһун күнүгэр бэлиэтэнэр.