Дьокуускайга «Сунтарцеолит» маҕаһыына аһылынна

296

Биһиги «Сунтарцеолит» тэрилтэбит устуоруйатыгар биир умнуллубат бэлиэ түгэн буолбутуттан үөрэбит, киэн туттабыт. Дьоллоох Дьокуускай куорат Крестьянскай ырыынагын иккис мэндиэмэнигэр «Сунтарцеолит» бородууксуйатын атыылыыр маҕаһыын үөрүүлээхтик аһылынна.


Бары билэрбит курдук, бу кэнники кэмнэргэ цеолит тааһы аҥардас производствоҕа эрэ буолбакка, дьон-сэргэ күннээҕи туттуутугар таһаарыыга күүстээх үлэ барар. Манна «Сунтарцеолит» тэрилтэ бэрэстэбиитэлэ, «САХА-Инновации» тэрилтэ салайааччыта, күтүөппүт Степан Иванов күүскэ үлэлэһэр. Инникитин өрөспүүбүлүкэ олохтоохторо цеолит таастан оҥоһуллубут араас бородууксуйаны хамаҕатык атыылаһар кыахтаныахтара.

Бу үөрүүлээх түгэнтэн сиэттэрэн, улууспут баһылыга Анатолий Григорьев саҥа анаммыт СӨ бырабыыталыстыба бэрэссэдээтэлэ Евгений Чекини улуустар баһылыктарыттан биир бастакынан сирэй көрсөн, ахсынньы ыйга Сунтаарга Бырабыыталыстыба көһө сылдьар мунньаҕын ыытарга кэпсэттэ. Онон хорутуулаах дириҥ кэпсэтии барара саарбахтаммат. Маныаха Петр Попов генеральнай дириэктэрдээх «Сунтарцеолит» тэрилтэ өрөспүүбүлүкэни барытын тилийэ көтөр кыахтаммыта улахан интэриэһи тардыа.