Чурапчыга улуус баһылыга кыттыылаах оскуола дириэктэрдэрин Сүбэ мунньаҕа тохсунньу 12 күнүгэр буолла. 2016 сыл өрөспүүбүлүкэҕэ эбии үөрэхтээһин сылынан биллэриллэн, улууска бу хайысха тула сыл устата туох-ханнык үлэ-хамнас барбытын аһаҕастык кэпсэтии ыытылынна.
Кэпсэтиигэ улуус үөрэҕин эйгэтигэр эбии үөрэхтээһини тэрийэн олорор “Радость» оҕо дьоҕурун сайыннарар киин, оҕону үлэнэн дьарыктаах оҥорор үөрэх-үлэ кэмбинээтэ, оҕо спордун оскуолата уонна улуус 26 оскуолатын дириэктэрдэрэ кытыннылар. Оҕо идэтин таба талан, киһи буолан иитиллэн тахсыытыгар маннык тэрилтэлэр оруоллара улахан. Маныаха улуус баһылыга Андрей Ноговицын бу хайысхаҕа ситимнээх үлэни сөптөөхтүк ирдээн, үөрэнээччи хабыллыытын төһө кыалларын үрдэтэн биэриини сорук быһыытынан туруорда. «Радость” оҕо дьоҕурун сайыннарар киин дириэктэрэ И.Уаров эбии үөрэхтээһин сылынан уопсай үлэни-хамнаһы сиһилии билиһиннэрдэ. Ол курдук, үөрэнээччилэр “Олонхо» дьиэтигэр мустан сыл устата араас куруһуоктарга дьарыктаммыттар. Анардас бу дьиэ иһигэр 9 куруһуок, маны тэҥэ үөрэтэр-үлэлэтэр мастарыскыайга биир куруһуок таһаарыылаахтык үлэлии олорор. Хас биирдии нэһилиэккэ филиал быһыытынан үлэ ыытылла турар.
Быйылгыттан улуус салалтатын, үөрэх управлениетын тэрийиитинэн “Ситим” диэн эбии үөрэххэ хайысха ылыныллан турар. Ол курдук, үөрэтэр-үлэлэтэр кэмбинээт сыаҕар оскуолалартан оҕолор кэлэн иккилии чаас дьарыктанар кыахтаахтар. Бу үөрэх чааһыгар оҕолор кыра миэбэли оҥорорго үөрэнэллэр. Дьарыкка сылдьар үөрэнээччилэри анал автобус таһар. Онон, өрөспүүбүлүкэҕэ биллэриллибит эбии үөрэхтээһин сыла, улууска биллэр хамсааһыннары оҥордо, үлэ-хамнас хаамыытын сөргүттэ, сэргэхситтэ.
Сүбэ кэпсэтии түмүгэр мустубут дириэктэрдэр санааларын этэн, бу хайысхаҕа көрсөр уустук да, мунаарар да боппуруостарын аһаҕастык ырытыстылар.