Эдьигээн оройуонунааҕы үөрэх управлениета 2016 сыллааҕы үлэтин отчуоттаата. Тэрээһиҥҥэ Эдьигээн орто оскуолатын учууталлара, оҕо саадын үлэһиттэрэ, эбии үөрэхтээһин педагогтара кытыннылар.
Ааспыт сылга агротехнологическай үөрэхтээһини сайыннарыыга туһуламмыт көрсүһүүлэр, туһааннаах тэрилтэлэри кытта дуогабар түһэрсиилэр, өрөспүүбүлүкэ улахан түһүлгэлэригэр бырайыактары көмүскээһин тиһиктээхтик ыытыллыбыт. Өрөспүүбүлүкэтээҕи үлэ миэстэтин дьаарбаҥкатыгар кыттан, оройуон үөрэҕин тэрилтэлэригэр 12 анал үөрэхтээх испэсэлиис кэлбит. Онтон Тупсарыы сыла оҕо садтарын территорияларын өрөмүөннээһиҥҥэ үгүс үлэ ыытылларыгар эбии кыаҕы биэрбит. Оҕо саадтарыгар Интернет хаачыстыбатын туспарар соруктаах, спутниковай антенналар атыылаһыллыбыттар.
Ааспыт сылга үөрэхтээһин эйгэтигэр 422 киһи үлэлээбит. Мантан 210-на педагогическай үлэһиттэр. 2016-2017 үөрэх дьылыгар 725 оҕо оскуолаҕа үөрэнэр, 502 кырачаан оҕо садыгар сылдьар. 2016 с. оройуон үрдүнэн уопсайа 813 оҕо эбии үөрэхтээһининэн хабыллыбыт.
Отчуокка этиллибитинэн, үп-харчы өттүгэр уустуктар төһө да баалларын иһин, үөрэхтээһин эйгэтигэр сөптөөх үп көрүллэн, оҕолорбут республикатааҕы, Россиятааҕы, аан дойутааҕы таһымнаах күрэстэргэ, куонкурустарга кыттар, сайыҥҥы сынньалаҥнарын туһалаахтык атаарар усулуобуйалара тэриллибит. Маныаха кэнники кэмҥэ үрдүк таһымнаах араас куонкурустарга кыттыы лаппа элбээбит.
Оҕо оскуолаҕа, оҕо садыгар эбэтэр эбии үөрэхтээһин тэрилтэлэригэр сылдьар кэмигэр биир сүрүн ирдэбил – үөрэх тэрилтэлэригэр куттал суох буолуутун хааччыйыы. Аҥардас бу сыалга ааспыт сылга 2 мөл. 571 тыһ. солк. үп көрүллүбүт.
Үөрэх управлениетын сыллааҕы отчуотун сүнньүнэн ыйытыылар, этиилэр киирбэтилэр. Түмүккэ үөрэх управлениетын начальнига А.В.Яковлева биир идэлээхтэрин иннигэр 2017 сылга үс сүрүн соругу туруорда: «Бастакынан, үөрэх хаачыстыбатын үрдэтии. Үөрэх миниистирэ Владимир Егоров үөрэхтээһиҥҥэ оҥоһуллар өйөбүл үчүгэй түмүгү көрдөрбөт диэн өрөспүүбүлүкэ салалтата астымматын биллэрэрин туһунан эттэ. Онон хас биирдии педагог үөрэх хаачыстыбатын үрдэтиигэ тус кылаатын киллэрэн, билиитин-көрүүтүн ууран кыһамньылаахтык үлэлиирин эрэйдэ. Иккиһинэн, учууталлар үөрэтэр таһымнарын үрдэтии сорук быһыытынан туруорулунна. Онуоха өрөспүүбүлүкэ эрэ иһинэн ыытыллар семинардарынан, куурустарынан муҥурдаммакка, өрөспүүбүлүкэ тас өттүгэр суоллары арыйыахпытын наада диэн буолла. Ити боппуруоска кэккэ былааннар бааллара этилиннэ. Үсүһүнэн, оҕо оскуолаттан анал идэлээх дипломнаах исписэлиис буолан тахсарын ситиһии этилиннэ».
Антонина Васильевна оҕо туох идэлээх буолан тахсарын 9-11 кылаастарга буолбакка, адьас кыратыттан, саадка сылдьыаҕыттан, алын кылаастартан саҕалаан быһаарынара оруоллаах буолуоҕун бэлиэтээтэ. «Онуоха сөптөөх үлэ ыытыллыахтаах. 9-11 кылаас үөрэнээччитэ мин чопчу бу идэни баһылыыбын диэн сыаллаах-соруктаах буоларын ситиһиэхтээхпит. Ону хайдах гынан олоххо киллэрэбит диэн ыйытыыга эһиги этиилэргитин күүтэбит», — диэн биир идэлээхтэригэр туһаайан эттэ.