Эдьигээн 385 сылыгар элбэх культурнай тэрээһин ыытыллыа

1059

Ааспыт нэдиэлэ бүтүүтэ Эдьигээн оройуонугар культура үлэһиттэрэ улуус киинигэр түмсэн ааспыт сыллааҕы үлэ түмүктэрин таһаардылар.


Дьаһал сүнньүнэн Норуот айымньытын уонна социальнай-культурнай технологиялар республикатааҕы дьиэлэрин научнай-методическай киинин салайааччыта Артем Корякин Дьокуускайтан кэлэн араас хабааннаах семинардары ыытта. Бу культура тэрилтэлэригэр тутулуга суох сыанабылы биэрэр уонна ол түмүгүнэн үлэни тупсарыыга ирдэбиллэри туруорар аналлаах. Ол курдук, Артем Николаевич кэпсээбитинэн, ааспыт сылга биһиги оройуоммутуттан “Эйгэ” этнографическай-культурнай киин, оройуоннааҕы библиотека, А.Я.Уваровскай аатынан оройуоннааҕы музей үлэлэрэ методическай ыйыыларга олоҕуран сыаналаммыт. Бу күннэргэ нэһилиэктэр дьаһалтарын специалистарыгар, культура тэрилтэлэрин дириэктэрдэригэр, уус-уран салайааччыларыгар, методистарыгар, библиотека, музей, оҕо искусствотын оскуолатын специалистарыгар аналлаах тус-туһунан семинар-практикумнар ыытылыннылар. Үбүлээһин боппуруостарыгар “Эдьигээн улууһа” МР үп салаатын специалистарын, баһылыгын солбуйааччыларын кытта көрүстэ.

Улуустааҕы культура тэрилтэлэрин отчуота буолла. Ол курдук, “Эйгэ” ЭКЦ, оройуоннааҕы кииннэммит библиотека, оройуоннааҕы музей,оҕо искусствотын оскуолата, Баахынайдааҕы “Сайдам” кулууп, Кыстатыамнааҕы “Нулгин”ЭКК, Бэстээхтээҕи “Сарыал” сынньалаҥ киинэ ааспыт 2016 сылга туох культурнай-маассабай үлэ ыытыллыбытын сиһилии кэпсээтилэр, видеосюжеттары көрдөрдүлэр.

Манна даҕатан эттэххэ, нэһилиэнньэ иннигэр культура тэрилтэлэрэ аан бастаан маннык быһыылаахтык отчуоттаатылар. Дьоҥҥо отчуоттааччылар ким бириистээх викторина тэрийдэ, ким музыкальнай нүөмэрдэри бэлэхтээтилэр, онон сэргэхтик ааста. Отчуоттааһын түмүгүнэн наҕараадалааһын буолла. “СӨ норуот уус-уран айымньыта сайдыытыгар кылааттарын иһин” диэн бочуоттаах бэлиэ бу күн Егорова Туяра Владимировнаҕа “Эйгэ” ЭКК метдиһыгар уонна Васильева Варвара Афанасьевнаҕа — уус-уран самодеятельность актыыбынай кыттыылаҕар, культура министиэристибэтин Бочуотунай грамотата, Махтал суруктара туттарылыннылар.

Салгыы культура айар коллективтарын, ол иһигэр “Осиктакан” үҥкүү-ырыа ансамблын народнай коллектива концертара туруорулунна. «Культура үлэһиттэрин иннигэр үүммүт сылга сыал-сорук туруорулунна. Олортон биирдэстэрэ — муус устар саҕаланыыта Эдьигээн оройуонугар Культура уонна духуобунай сайдыы Министерствотын күннэрэ тэриллэрэ былааннанар. Кулун тутарга Эдьигээн 385 сыла туоларынан сибээстээн, нэһилиэктэр икки ардыларыгар уус-уран самодеятельность фестивала ыытыллан түмүктэниэҕэ. Ити бэлиэ даатаҕа сөп түбэһиннэрэн, балаҕан ыйыгар Дьокуускай куоракка Эдьигээн оройуонун Күннэрэ тэриллэрэ быланнанар», — диэн кэпсээтэ культура уонна туризм сайдыытын отделын начальнига Ирина Бурцева.