Эдьигээн орто оскуолатыгар үлэлиир «Эдэр корреспондент» куруһуок көҕүлээһининэн, сурутуу хампаанньатын кэмигэр сахалыы тыллаах кылаас кэллэктииптэрин, төрөппүттэри, учууталлары кытта көрсүһүүлэр ыытылыннылар. Ол түмүгэр, Эдьигээн оройуона «Кэскил» хаһыакка 100 устуука сурутууланна.
Маныаха улахан өйөбүлүнэн «Кэскил» хаһыакка сурутууну бэлэхтиибин» диэн иккис төгүлүн ыытыллар акциябыт буолбутун бэлиэтиибит. Бу акцияҕа оройуон дьаһалтата, тэрилтэ салайааччылара, чааһынай урбаанньыттар, учууталлар көхтөөхтүк кытыннылар. Тэрээһиҥҥэ кыттыбыт хас биирдии салайааччы, исписэлиис, учуутал тус бэйэтин хармааныттан 580 солк. 50 харчыны төлөөн оҕолорго хаһыат сурутуутун бэлэхтээтэ. Кинилэр хас биирдиилэрэ акцияҕа кыттыы суолтата үрдүгүн тус бэйэлэринэн өйдүүллэр. Тоҕо диэтэххэ, маннык дьаһаныы ааҕыы культуратын олохсутар, 80 сыл устата оҕо-аймаҕы кэрэҕэ, сырдыкка сирдээн кэлбит «Бэлэм буол» -«Кэскил» хаһыаты кытта билиҥҥи көлүөнэ кэнчээрини ситимниир сүрүн соруктаах. Итинник этэн туран, 2017 сыл бастакы аҥарыгар сурутууну бэлэхтээбит оройуон, тэрилтэ салайааччыларын, чааһынай урбаанньыттар, учууталлар ааттарын киэн тутта ааттыыбыт, кинилэргэ махтанабыт. Маны сэргэ Эдьигээн орто оскуолатын кэллэктиибэ көхтөөхтүк кыттыбытын эмиэ киэн туттан этэбит.
Акцияҕа бу курдук тэрээһиннээхтик ылсыы түмүгүнэн, 34 сурутуу Эдьигээн уонна Лииндэ оскуолатын үөрэнээччилэригэр аадырыстаан туттарылынна.
«Кэскил» оҕо хаһыата ыытар «Бочуот балаһата» акциятыгар 100 бырыһыан суруппут кылаас киирэр кыахтаах. Быйыл итинник улахан кирбиини Эдьигээн орто скуолатын 26 оҕолоох 4 «а» кылааһын (сал. Л.Н. Сыроватская) кэллэктиибэ ситистэ. Маны сэргэ, «Бочуот балаһатыгар» 12 оҕолоох 6 «а» кылаас кэллэктиибэ (сал. А.Н. Ким, А.П. Васильева) үһүс төгүлүн киирдэ.
Сыл иккис аҥарыгар «Кэскилгэ» сурутууга 1 «а» (сал. А.Н. Сивцева), 3 «а» (сал. З.В. Игнатьева), 2 «а» (сал. И.К. Иванова), 5 «а» (сал. С.Э. Элебесова), 7 «а» (сал. Т.В. Охлопкова) кылаастар лаппа көхтөөхтүк суруттарбыттарын бэлиэтиир оруннаах.
Лииндэ уопсай үөрэхтээһинин оскуолатыгар оҕо хаһыатыгар сурутуу күүскэ ыытылыбытын ойуччу тутан бэлиэтиибит. Быйылгы үөрэх дьылыгар оскуолаҕа уонча оҕону түмэр «Лииндэ» эдэр корреспонденнар куруһуоктара үлэлиир. Кинилэр «Чуораан» диэн ыйга биирдэ оскуола хаһыатын таһаараллар. «Лииндэ» юнкорпост быһыытынан «Бэргэн» республикатааҕы оҕо прессатын агенствотыгар регситрацияланна. Оскуола быйылгы үөрэх дьылыгар 40 үөрэнээччилээх буоллаҕына, мантан 24-дэ «Кэскилгэ» суруттарда. Элбэх оҕолоох ыалларга анаан оскуола учууталлара уонна чааһынай урбаанньыт Григорий Дмитриев хаһыат сурутуутун бэлэхтээтилэр.
«Кэскилгэ» кылааһынан 100 бырыһыан суруттаран, «Бочуот балаһатыгар» түөрт кылаас киирдэ: иккистэр (сал. Н.В. Софронова, 6 оҕо), төрдүстэр (сал. Н.Ю. Болтунова, 3 оҕо), сэттистэр (сал. С.А. Руфова, 6 оҕо), ахсыстар (сал. Я.Я. Корякина, 6 оҕо).
Онон оҕо хаһыатыгар сурутуубут көрдөрүүтэ хайа да сыллааҕар үрдүк. Аны сурутуубут кэмигэр кэлэрин күүтэбит уонна хаһыат ыытар үлэтигэр кыттары ситиһэргэ кыһаллабыт.