Эдьигээн оҕолоро сайыҥҥы үлэ тула түмсэллэр

309

Оҕо сайыҥҥы сынньалаҥын туһалаахтык атаарарыгар судаарыстыба өттүттэн улахан болҕомто уурулларын хоту сир олохтоохторо олус махтана ахталлар.


Эдьигээн оҕолоро сайыҥҥы сынньалаҥнарыгар үлэ лааҕырдарыгар сылдьалларын биһирииллэр. Төрөппүттэр даҕаны сэргиллэр. Эдьигээн оройуонун холобуругар көрдөххө балаһыанньа маннык: Баахынай нэһилиэгэр сайын устата үлэ лааҕырыгар 12 оҕо (4 уол уонна 8 кыыс) хабыллан сырытта. Оҕолор мас кэрдиллибит сиригэр мутуктары, бөҕүн-сыыһын хомуйдулар. Ону таһынан дэриэбинэҕэ уулуссалары тупсарыыга үлэлэстилэр. Шлак таһан, суоллары тэҥнээн биэрдилэр. Уулусса сыыстарын, бөхтөрүн хомуйдулар. Үлэ лааҕырын оҕолоро нэһилиэкккэ баар икки оҕо площадкатын ыраастаатылар.

Үлэ дьоно ардахтаах күн диэн олорбокко, ыйыллыбыт болдьохторугар толору үлэлээбиттэр. Киэһэ өттүгэр сибиинньэлээх, кууруссалаах ыалга анаан балыктаан көмө быһыытынан туттарбыттар.

Биир күн сайылык уҥуор балаакканан сытан биир куул «хара» балыгы балыктаан, Петрова Мария Иннокентьевнаҕа уонна Розалия Семеновнаҕа уолаттар тус бэйэлэрэ аҕалан туттарбыттар.

Маны таһынан нэһилиэк кырдьаҕас олохтоохторугар анаан эмтээх үүнээйилэри — сэппээрээк оту, сиксэ, уулаах отон угун хомуйан биэрбиттэр.

Сүрүн улахан үлэ мутукча таһыытыгар уонна суоллары хомуйууга барбыт. Ити курдук Баахынай оҕолоро таһаарыылаахтык үлэлээбиттэрин бэлиэтиэххэ сөп. Бу үлэлээбит кэмнэригэр кинилэр хамнас аахсыахтара, ону таһынан үлэ үөрүйэхтэригэр үөрэммиттэрэ чуолкай.