Үөһээ Бүлүү бөһүөлэгэр игирэ ньирэй төрөөтө. Сардаана, Руслан Андреевтар түөрт ыанар ынахтаахтара төрдүөн төрөөбүттэр. Игирэ ньирэйдэр «убайдара» бары оҕустар: Сэмэнчик, Бэлиэлээх, Маленький диэн ааттаахтар.
«Бэс ыйын 5 күнүгэр II-с Билиилээх түөлбэ территориятыгар Ойуунускай аатынан переулокка турар икки этээстээх дьиэ аттыгар ынах төрөөбүт, икки оҕолоох. Сүтүктээхтэр түргэнник кэлэн ыларгытыгар. Ыттар ньирэйдэри сиэри бөҕөлөр» — диэн ис хоһоонноох биллэрии сарсыарда тоҕус чааһы ааһыыта социальнай ситим нөҥүө тарҕаммыта. Онтон эбиэт иннигэр «Ыалларбыт баран ыллылар. Игирэлэр эбит. Биллэрбит, манаабыт киһиэхэ махтал!» — диэн тыллардаах иһитиннэрии харда кэриэтэ кэллэ.
Биир хонуктаах игирэ ньирэйдэри көрөөрү Октябрьскай уулусса 12 №-дээх дьиэтигэр олорор Андреевтарга тиийэ сырыттыбыт. Ыал ийэтин кытта билистибит, Сардаана Семеновна алтыс сылыгар игирэ ньирэйдэммит Маҥаачыйа туһунан маннык кэпсээтэ: «Игирэ буолуохтара диэн санаабатахпыт даҕаны. Иһэ улаханын иһин улахан төрүөхтээх буолсу дэспиппит. Бу күннэргэ төрүүрүн күүтэ сылдьыбыппыт. Мэччийэ баран баран төрөөн кэбиспит этэ. Аҕабыт Руслан Григорьевич убайдара биллэриини көрбүттэрин туһунан кэпсээбиттэригэр, биһиги Маҥаачыйабыт буолуо диэн көрө барбыппыт – биһиэнэ эбит. Быйылгы төрүөхтэрбит бары оҕустар. Игирэлэр эмиэ оҕустар. Тыллаабыт дьоҥҥо улаханнык махтанабыт.»
Ньирэйдэргэ аат биэрэ иликтэр. Онон уратытык күн сирин көрбүт тарбыйахтары ааттыырга куонкурус биллэрилиннэ. Андреевтар талбыт ааттарын толкуйдаабыт киһи Маҥаачыйа үүтүн бэлэх тутуоҕа. Түмүгэ бэс ыйын 6 күнүгэр биллиэҕэ.