Быйыл ахсынньы 1 күнүгэр өрөспүүбүлүкэбитигэр иккис сылын «Кыһын Саха сириттэн саҕаланар» диэн анал аахсыйа ыытылынна. Ол курдук, бу күн Дьокуускай куоракка, улуустар кииннэригэр үөрүүлээх быһыыга-майгыга харыйа уотун уматыы ураты түгэнэ буолла. Билэргит курдук, тымныы муҥутуур оройо биһиги өрөспүүбүлүкэбитигэр – Өймөкөөҥҥө бэлиэтэммитэ. Онон биһиэхэ маннык аахсыйа ыытыллара өйдөнөр.
Ол курдук, бэҕэһээ улууспут киинигэр, Ленин болуоссатыгар, харыйа уотун уматыы үөрүүлээх тэрээһинэ буолла. Төһө да халлаан тымныытын үрдүнэн, бу кэрэ түгэни көрөөрү, онно быһаччы кыттыыны ылаары үгүс кырачаан кэлбит. Буолумуна, оҕо-аймах Саҥа дьыл үүнэр түгэнин сылы быһа ккүтэр, сүрэҕин чопчутугар иитиэхтээн илдьэ сылдьар буоллаҕа.
Үөрүүлээх чаас саҕаланыан иннинэ тэрийээччилэр оҕолору оонньоттулар. Кырачааннар сүүрэн-көтөн, өрө ойуоккалаан тоҥо быһыытыйбыттарын син аһарыннылар. Онтон күүтүүлээх күндү ыалдьыт Тымныы Оҕонньор кэлэн, оҕолору кытта тэҥҥэ харыйа уотун уматтылар. Бары бииргэ «Биир!» диэттэрин утаа харыйа уота күлүмүрдээн кэллэ. Ону сэргэ, оҕо-аймах үөрүүтэ үксээтэ. Түмүккэ мустубут дьону улуус баһылыга Анатолий Григорьев эҕэрдэлээтэ. Бары үтүөнү баҕарда.