Уһун Күөлгэ үгэс буолбут, икки сыл буола-буола ыытыллар СӨ успуордун Бочуоттаах маастара, Сунтаар улууһун, Арыылаах нэһилиэгин Бочуоттаах гражданина Виктор Николаев-Хотой Бииктэр бирииһигэр өрөспүүбүлүкэтээҕи мас тардыһыы күрэҕэ спортсменнары, бу успуорду сэҥээрээччилэри түмтэ. Ленскэйтэн, Өлүөхүмэттэн, Мииринэйтэн, Намтан, Ньурбаттан уонна Сунтаартан барыта 93 мадьыны сааһынан, ыйааһынынан 20 бөлөххө арахсан кииристилэр.
Хотой Бииктэр бирииһигэр ыытыллыбыт мас тардыһыытыгар көрөөччүлэр үчүгэй киирсиилэри көрдүлэр. Сунтаардар эрэ буолбакка, өрөспүүбүлүкэ киэн туттар киһитэ Федор Федоров, успуорт маастардара, өрөспүүбүлүкэ, Арассыыйа, норуоттар икки ардыларынааҕы күрэхтэһиилэр чөмпүйүөннэрэ, призердара бөдөҥ-садаҥ 130 киилэлээх мадьынылар, Нам улууһуттан кэлбит эдэр дьону кытары киирсибит бэтэрээн спортсмен Гаврил Петров, элбэх саҥа ааттар күрэхтэһиини көрө кэлбит дьон бэркэ диэн сэргэхситтилэр. Бу маны барытын мас тардыһыы диэн баран муннукка ытаабыт Архыып Туола диэнинэн биллэр Анатолий Петров Сиэйэттэн кэлэн, буоларын курдук, тэтэрээтигэр сурунан, архыыбыгар киллэрбит буолуохтаах. Сунтаар улууһун мас тардыһыытыгар солбуллубат комментатора Сергей Филиппов Маар Күөлтэн кэлэн күрэхтэһиини эбии киэргэттэ. Кылаабынай судьуйанан мас тардыһыытыгар элбэх кылаатын уурбут Анатолий Петров, помост судуьуйаларынан Маар Күөлтэн Олег Наумов, Дмитрий Наумов, Уһун Күөлтэн Иван Тихонов, Иван Поскачин үлэлээтилэр.
Күрэхтэһии түмүгэ маннык буолла. 2001 с. төрүөх уонна онтон кыра саастаах оҕолорго 50 киилэҕэ I миэстэ Валерий Иванов (Күндэйэ), II миэстэ Максим Габышев (Өлүөхүмэ), III миэстэ Алексей Петров (Күндэйэ) буоллулар. 55 киилэҕэ I – Тимур Илларионов (Түбэй), II – Егор Герасимов (Тойбохой), III – Дмитрий Прокопьев (Ньурба). 60 киилэҕэ I – Айсен Андросов (Ньурба), II – Виктор Шакиров (Өлүөхүмэ), III – Александр Семенов (Бордоҥ). 65 киилэҕэ I – Христофор Стручков (Ньурба) ылла, II – Фаян Сабычиков (Ньурба), III – Руслан Яковлев (Сунтаар). 70 киилэҕэ I – Вениамин Попов (Өлүөхүмэ), II – Алексей Михайлов (Маар Күөл), III – Андрей Павлов (Ньурба). 80 киилэттэн үөһээ ыйааһыҥҥа Ньурба уолаттара Анатолий Степанов I, Родион Кириллин II миэстэ буоллулар.
Эр дьоҥҥо (2000 с. төрүөх уонна онтон улахан саастаахтарга) 60 киилэҕэ I миэстэни Вадим Анахин (Ленскэй), II миэстэни Арылхан Егоров (Түбэй), III миэстэни Андрей Хлебов (Дьаархан) ыллылар. 65 киилэҕэ I – Николай Винокуров (Түбэй), II – Дмитрий Чалбанов (Өлүөхүмэ), III – Иван Егоров (Куокуну). 70 киилэҕэ I – Тимофей Большаков (Аллыҥа), II – Иван Иванов (Ньурба) III – Иван Мырьянов (МПТИ). 75 киилэҕэ I – Дьулустаан Деллохов (МПТИ), II – Михаил Лазарев (МПТИ), III – Гаврил Сивцев (Өлүөхүмэ). 80 киилэҕэ I – Владимир Михайлов (МПТИ), II – Семен Саввинов (Маар Күөл), III – Евгений Селляхов (Сунтаар). 85 киилэҕэ I – Валерий Николаев (Мииринэй), II – Петр Лукиянчук (Маар Күөл), III – Дмитрий Григорьев (Ньурба). 105 киилэҕэ I – Федор Федоров (Сунтаар), II – Степан Тобонов (Ньурба), III – Юрий Михайлов (Маар Күөл). 105 киилэттэн үөһээ ыйааһыҥҥа I – Евгений Попов (Өлүөхүмэ), II – Закиржон Нутридинов.
Дьахталларга 65 киилэҕэ I миэстэ Надежда Егорова (Күндэйэ) буолла, II-һи Софья Ощепкова (Сунтаар), III-һү Дарья Бузина (Мииринэй) ыллылар. 75 киилэҕэ I – Марианна Семенова (Күндэйэ), II – Саргылаана Токусарова (Ньурба).
Бэтэрээннэргэ 65 киилэҕэ I миэстэни Гаврил Петров (Нам), II миэстэни Григорий Данилов (Куокуну), III миэстэни Валерий Попов (Өлүөхүмэ) ыллылар. 85 киилэттэн үөһээ ыйааһыҥҥа I миэстэ Василий Архипов, II миэстэ Октавиан Горохов, III Айаал Петров буоллулар.
Оҕолорго 80 киилэҕэ Артем Игнатьев (Түбэй), дьахталларга 85 киилэҕэ Акулина Уарова (Бордоҥ), 85 киилэттэн үөһээ ыйааһыҥҥа Юлия Михайлова (Ньурба) ыйааһыннарыгар соҕотох буоланнар, туран эрэ кыһыл көмүс мэтээли кэттилэр.
Күрэхтэһии түмүгэр, көрөөччүлэр бары кэтэспит түгэннэринэн, муҥутуур кыайыылааҕы быһаарар киирсиилэр буоллулар. Оҕолорго 7, улахан дьоҥҥо 6 киһи суруттаран, бэйэлэрин кыахтарын холонон көрдүлэр. Финалга оҕолорго Анатолий Степанов (97 кг, Ньурба) Вениамин Поповтуун (70 кг, Өлүөхүмэ), улахан дьоҥҥо Федор Федоров (104 кг, Сунтаар) Евгений Поповтуун (130 кг, Өлүөхүмэ) күөн көрүстүлэр. Эрийсиилээх киирсиилэр кэннилэриттэн күрэхтэһии муҥутуур кыайыылаахтарын аатын ыланнар Анатолий Степанов микроволновай оһох, Федор Федоров МР-43 штучнай саа хаһаайыннарынан буоллулар.
Күрэхтэһии аһыллыытыгар Виктор Николаев-Хотой Бииктэр, улуус баһылыгын бастакы солбуйааччы Николай Александров, улуустааҕы мас тардыһыы федерациятын бэрэссэдээтэлэ Гаврил Еремеев, Арыылаах нэһилиэгин баһылыга Иван Игнатьев күрэхтэһии аһыллыбытынан эҕэрдэлээн туран, күрэхтэһээччилэргэ ситиһиини баҕардылар. Нэһилиэк баһылыга Иван Николаевич нэһилиэк уонна улуус кыттыһан туруорбут убаһа сэртипикээтин Виктор Макаровичка туттарда. Улуус баһылыга Анатолий Григорьев эҕэрдэ суругун уонна сэмэй бэлэҕин Николай Александров туттарда. Тэрийээччилэр успуонсардарга – ИП Иванов И.П., «ЭПЛ Даймонд», «Уран Саха» хампаанньаларга, «Сунтарцеолит» ХЭТ, «Наталия», «Альфа», «Нюрбина», «Татыйыына», «Корона», «Маяк», «Туймаада» маҕаһыыннарга махталларын биллэрдилэр.