Өлөөн улууһугар Солоҕоон нэһилиэгэ тэриллибитэ 85 сылын туолар үбүлүөйэ Ээйиккэ бэлиэтэннэ.
Солоҕооҥҥо, Өлөөн атын нэһилиэктэрин кытта тэҥнээтэххэ, манна ынах сүөһүнү, сыспай сиэллээҕи ииттэллэр. Нэһилиэк Ньурба сириттэн чугас сытар буолан, Дьокуускайга барар буоллахха айан сырыыта мантан Ньурбанан, Удачнайынан ордук кэбэҕэс. Быйылгыттан Ан-2 самолет Ньурбаттан кэлэр буолла. Өлөөн территорията улахана бэрт буолан, транспортнай логистиката ыарахан. Этэргэ дылы Ээйик сорох ыччата Өлөөн бөһүөлэгин харахтаан да көрө иликтэр, Дьэлиҥдэ туһунан истэллэр эрэ, эгэ табаны көрүөхтэрэ кэлиэ дуо?
Үбүлүөйгэ күндү ыалдьыттарынан Дьокуускайтан эбэҥкилэр ассоциацияларын председателэ Б.А.Николаев, Өлөөн улууһун баһылыга А.С.Иванов, Нам улууһуттан Көбөкөн нэһилиэгин баһылыга К.Н.Ноговицын, ”Фрунзе” МТ баһылыга И.Г.Ядрихинскай буоллулар. Үбүлүөй үөрүүлээх мунньаҕар кырдьаҕас каюр-табаһыт О.А.Боековаҕа улуус Бочуоттаах олохтооҕун аата иҥэрилиннэ. Улахан концерт, Ээйик талааннаах уруһуйдьута Владимир Семенов икки быыстапката ыалдьыттар уонна олохтоохтор көрүүлэригэр туруорулунна.
Үбүлүөй буолуо биир хонук иннинэ Солоҕоон нэһилиэгин саҥа талыллыбыт баһылыгын И.П.Степанов биһирэмэ буолла. Оттон үбүлүөй кэнниттэн Өлөөн улууһун баһылыгынан үлэлээбит А.С.Иванов 2016 сыллаах үлэтин отчуота оҥоһулунна. Ээйиктэр бэйэлэрин ыччаттара Өлөөн атын нэһилиэктэрин ыччаттарын курдук эмиэ промышленность үлэтигэр сысталларыгар баҕаралларын биллэрдилэр, цифровой телевидение киириитин, сотовай сибээс, почта үлэтин тупсарарга эттилэр, нэһилиэккэ участковайы туруорустулар, Дьэлиҥдэ үтүө холобурун батыһан чөл олохтоох нэһилиэк буолуохтарын баҕаралларын биллэрдилэр.
Отчуот кэнниттэн ээйиктэр улуус дьаһалтатын 2016 сыллаах үлэтин биһирииллэрин биллэрдилэр.