Ахсынньы 21 күнүгэр Сангаарга “Дабаан” хаһыат редакциятын дьиэтигэр Чөл олох кабинета аһылынна.
Быйыл редакция Ил Дархан “Арыгылааһыны утары охсуһуу” гранын ылан, бу иһинэн ыытыллыахтаах үлэтин саҕалаата. Ааспыт нэдиэлэҕэ үс нэһилиэккэ сылдьыбыттара, билигин улуус киинигэр үлэлииргэ анаан Чөл олох кабинетын арыйдылар.
Куһаҕан дьаллыктары утары бары бииргэ охсустахха эрэ үлэ түмүктээх буолара биллэр. Ол иһин оҕону, ыччаты тэҥинэн улахан дьону кытта үлэлиир туһааннаах тэрилтэлэр бэрэстэбиитэллэрэ: улуус дьаһалтатыттан, 1 №-дээх оскуола, Сангаардааҕы гимназиятын үөрэнээччилэрэ, учууталлара, бөһүөлэк, улуус ыччатын кытта үлэлиир лидердар, полицияттан саастарын ситэ илик оҕолору кытта үлэлэһэр инспектордар, нэһилиэнньэ социальнай көмөлөөх буолуутун управлениетын исписэлиистэрэ, наркология үлэһиттэрэ, общественность бэрэстэбиитэллэрэ кэллилэр. Куһаҕан дьаллыктары утары уруккуттан үлэлиир дьон бу аан бастакы мустуулара эбит, онон кэпсэтии ким ханнык хайысханан тугу үлэлиириттэн итиэннэ кабинеты инникитин хайдах үлэлэтэбит диэнтэн саҕаланна.
Кэпсэтиини улуус баһылыгын социальнай боппуруостарга солбуйааччы А.Н.Тимофеев уонна хаһыат кылаабынай редактора Виктор Эверстов иилээн-саҕалаан ыыттылар.
Уопсай кэпсэтии түмүгүнэн, сүрүн үлэни үүнэн эрэр оҕоҕо, ыччакка туһаайыахха диэн буолла. Ол курдук, арыгылааһын-табахтааһын улам эдэримсийэн иһэрэ дьиксиннэрэр. Хомойуох иһин, арыгы проблемата үгүс дьиэ кэргэҥҥэ баар буолан, маннык лекциялары, видеокиинэлэри уонча саастаах оҕолор кытта өйдүүллэрэ билиннэ. Онон куһаҕан дьаллыктарга утарсар наадалааҕын өйдөтөр үлэ төһөнөн эрдэттэн саҕаланар соччонон үчүгэй диэн буолла. Газированнай утахтары оҕолорго атыылыыры бобуохха наада диэн этии киирдэ. Арыгытын, табаҕын быраҕа сатыыр эбэтэр саҥа бырахпыт киһиэхэ ону тугунан солбуйуохха, атынынан интэриэһиргэтиэххэ сөбүй диэн сиэрдээх ыйытыы турда. Секциялар, бассейн барыта төлөбүрдээхтэр, киһи барыта төлөөн сылдьар кыаҕа суох. Спорт управлениета анал күннэргэ акциялары ыытарга бэлэмин иһитиннэрдэ. Куһаҕан дьаллыктан босхоломмут киһи санаатын, чөл олохтоох дэриэбинэлэр тустарынан элбэхтик кэпсиэххэ, сырдатыахха наадалааҕын эттилэр. Лекциялар хатыласпакка сырыы аайы ис хоһоонноро уларыйа туруохтарын баҕардылар, биир өттүнэн аҥардас лекциянан муҥурдаммакка, нэһилиэктэргэ баран акциялары, күрэхтэһиилэри, тэрээһиннэри ыытар наадалааҕын эттилэр. Кабинекка былааннаммыт үлэ бара турарыгар, психолог үлэлииригэр, трениннэр ыытыллалларыгар баҕа санааларын тиэртилэр. Төрөппүт оскуолаҕа тиийиэҕинээҕэр маннык кабинекка психологы, учууталы кытта иитии, үөрэх проблемаларын быһаарсара, кэпсэтэрэ ордук буолуо диэтилэр.
Нэһилиэктэргэ командировканан барыы үгүс тэрилтэни интэриэһиргэттэ, ордук ыччат управлениета редакция кэлэктиибин кытта бу хайысханан элбэхтик бииргэ айанныыр, үлэлиир баҕалааҕын иһитиннэрдэ.
Кэпсэтии түмүгүнэн, кабинет кэлэр сылтан тигинэччи үлэлиир былаана чуолкайданна, кылаабынайа үлэлэһэр баҕалаах дьон элбэҕэ, көхтөөҕө үөртэ.