Өлөөҥҥө иллэрээ күн оҕо спортивнай оскуолатын саалатыгар инбэлииттэр декадаларыгар аналлаах спортивнай күрэхтэһии үөрүүлээх аһыллыыта буолла.
Саалаҕа толору мустубут дьону-сэргэни оҕо спортивнай оскуолатын иитиллээччилэрэ тэтимнээх үҥкүүнэн эҕэрдэлээтилэр. Салгыы оройуоннааҕы дьиэ кэргэн, спорт отделын начальнига Ия Федорова, отдел сүрүннүүр испэ-сэлииһэ Влад Семенов, нэһилиэнньэ социальнай харысхаллаах буолуутун киинин салайааччы Туйаара Колодезникова күөн күрэс кыттааччыларыгар истиҥ тылларын тиэртилэр, ситиһиилэри баҕардылар.
Спортсменнар бастакы күн хаамыскалаатылар, хабылыкка оонньоотулар, дуобаттаатылар. Хомуска оонньоон дьүрүһүтэн күрэхтэстилэр. Уруһуй куонкуруһугар оҕолуун, улахан дьоннуун төрөөбүт дойдуларын хоһуйбуттарын, быыстапкаҕа уус-уран оҥоһуктарын аҕалбыттарын көрөөччүлэр улаханнык кэрэхсээтилэр. Таһырдьа төһө да муус тоһуттар тымныыта турбутун иһин, олоххо дьулуурдаах, сырдыкка тардыһыылаах дьон ох курдук оҥостон күрэхтэһиигэ кытта сылдьаллара, чахчы да, барыбытыгар үтүө холобур буолар. Билигин декада чэрчитинэн күрэхтэһиилэр салгыы ыытылла тураллар. Күрэхтэһии түмүгэ, наҕараадалааһын ахсынньы 10 күнүгэр “Илкит” култуура уонна спорт киинигэр буолуохтаах. Онуоха диэри кыттааччылар күн аайы саалаҕа үөрэ-көтө мусталлар, кэрэҕэ талаһыы кинилэргэ дьоһуннаахай күүһү биэрэриттэн эрчимирэллэрин этэллэр.