Доруобуйаларынан хааччахтаах дьоҥҥо аналлаах декада ыытылла турарынан сибээстээн, Кирбэй нэһилиэгин олохтооҕо Феодосия Данилова туһунан билиһиннэриэхпин баҕарабын. Ивановтар ийэлэрэ Евдокия Васильевна оҕолоро кыра эрдэхтэринэ ыалдьан олохтон туораабыта. Гоша, Феня, Игорь аҕаларын Николай Васильевич көрүүтүгэр-истиитигэр хаалбыттара. Аҕалара табаһыт буолан, оҕолорун ыстаадаҕа илдьэ сылдьыбыта.
Феня Харыйалаах орто оскуолатын бүтэрэн баран бастаан табаһыттаабыта, кэлин дьиэ үлэһитинэн үлэлээбитэ. Кини кыра эрдэҕиттэн уолаттартан хаалсыбат кытыгырас, таба арҕаһыттан тутуһа сылдьар сытыы кыыс буолааччы. Ыал соҕотох кыыһа ханнык баҕарар үлэни оҥоро үөрэммитэ. Кыысчаан окко түспүт оҥоһуутунан, сиргэ кэлбит сэрэбиэйинэн бастакы кылаастан бииргэ үөрэммит доҕорунуун, Юрий Даниловтыын, эдэр дьон сиэринэн доҕордоһон, сүрэхтэринэн сөбүлэһэн, сүбэлэрин холбоон 1987 сыллаахха ыал буолбуттара. Үс кыыс оҕону төрөтөн, кинилэр ситиһиилэриттэн үөрэн, сарын-сарыннарыттан өйөһөн оҕолоро үлэһит буолалларыгар олук уурсубуттара. Аҕалара Юрий Иванович оҕо эрдэҕиттэн үлэһит, сымнаҕас майгылаах, көнө киһи. Төрөөбүт сопхуоһугар үлэлии сылдьан эмискэ ыалдьан иккис группалаах инбэлиит буолбута. Билигин дьиэтигэр олорор, ол да буоллар дьиэ ис-тас үлэтин барытын бэйэтин кыаҕынан толорор. Кини аҕа, эһээ быһыытынан ахсаабат кыһамньылаах, куһаҕан дьаллыгы батыспат нэһилиэккэ биир убаастанар киһи. Феодосия Николаевна дьиэ кэргэнигэр тапталлаах ийэ, эрэллээх кэргэн, сиэн оҕолор маанылатар күн-күбэй эбээлэрэ. Кини чуор куоластаах ырыаһыт, хомусчут, спортсменка, хоһоону дорҕоонноохтук ааҕарын сөбүлүүр, ханнык да култууру тэрээһиниттэн туора турбат. Инбэлииттэргэ аналлаах декадаларга сылын аайы спортивнай күрэстэргэ кыттан, өрүү бириистээх миэстэлэргэ тиксэр. 2013 сыллаахха Өлөөн улууһуттан Дьокуускайга тиийэн дуобакка, хабылыкка, хаамыскаҕа, саанан ытыыга, кэлээскэлээх спортка күрэхтэһэн, хоту улуустарга бастакы миэстэ буолбуттара. Феодосия 2014 сыл түмүгүнэн оро-йуоннааҕы Чемпионнар баалларыгар “Бастыҥ спортсменынан” ааттаммыта, инбэлииттэр уопсастыбаларын салайан “Бастыҥ салайааччы” аатын ылбыта. Нэһилиэгин үбүлүөйүгэр аналлаах олорор түөлбэтин уус-уран фестивалыгар ыллаан дьонун үөрдүбүтэ. Иллэҥ кэмигэр сиэннэрин биэбэйдэһэр, иистэнэр, оҕолоругар, сиэннэригэр анаан сылаас таҥас тигэр. Кыргыттара орто оскуолаҕа ситиһиилээхтик үөрэнэн улахан кыыс Зина киномеханик идэтин баһылаабыта, орто кыыс Марианна Харыйалаах орто оскуолатын үрүҥ көмүс мэтээлинэн бүтэрбитэ. Дьокуускайдааҕы кооперативнай техникумҥа үөрэнэн бухгалтер-кассир идэтин ылбыта. Билигин ХИФУ-га волейболга тренер идэтин баһылаары иккис кууруска үөрэнэ сылдьар. Кыра кыыс Таня Дьокуускайга курска үөрэнэн биэкэр идэлээх. Феодосия Николаевна олоххо девиһэ “Инним диэки хотуулаахтык“ диэн.
«Киһиэхэ кыра да үөрүү кыымын саҕар, бэлэхтиир олус наада. Ол киһиэхэ туохха да тэҥнэммэт бигэ тирэх буолар, сүдү күүс биэрэр. Маныаха сылын аайы инбэлииттэр декадаларыгар тэрилтэлэр араас тэрээһиннэри ыыталлар. “Өлөөн” МУТ, “Кэрэчээнэ” оҕо уһуйаана, онтон да атын тэрилтэлэр кими да көтүппэккэ бэлэх оҥороллор. Көхтөөхтүк эҕэрдэлииллэр. Былырыын Харыйалаах оскуолатын кэллэктиибэ концертаан онно киирбит харчыларын инбэлииттэр декадаларыгар биэс инбэлиит оҕоҕо бэлэх быһыытынан туттарбыппыт. Нэһилиэк чааһынай урбаанньыттара Зоя Гагина, Людмила Бурак, Светлана Никифорова инбэлииттэр декадаларыгар бирииһинэн көмөлөһөллөр. Кинилэр хаһан даҕаны аккаастаабаттарыттан үөрэбин уонна киэн туттабын. Маннык үтүө санаалаах тэрилтэлэр салайаачччыларыгар, урбаанньыттарбар махтанабын. Олохторугар ситиһиилэри, кытаанах доруобуйаны, дьолу баҕарабын”, — диэн үөрэ-көтө кэпсиир.
Ити курдук Феодосия Николаевна Данилова көхтөөх олоҕу тутуһар, күүстээх санаатынан тулалыыр дьонугар холобур буолар.