Сунтаар улууһугар СӨ Бырабыыталыстыбатын 2017 сыллаах үлэтин түмүгүн отчуоттуур 2-с бөлөх үлэтин Кириэстээх нэһилиэгиттэн саҕалаата.
Отчуот туһунан уопсай дакылаат кэннэ кириэстээхтэр интэриэһиргиир боппуруостарын туруордулар. Ол курдук, биэнсийэ ааҕыллыытын, оҕону иитии, тендер, мусуой үлэтин, сибээс туһунан ыйытыылар киирдилэр. Олохтоохтор уу ыраастыыр ыстаансыйа үлэтэ ханна тиийбитин туоһуластылар. Бу күннэргэ Кириэстээххэ 60 км усталаах опто-волоконнай ситим хаабыла кэлбитин туһунан интэриниэккэ сонун тарҕаммыта, отчуот буолар күнүгэр биригээдэ кэлэн үлэтин саҕалаары оҥосто сылдьара. Евгений Ноговицын бу сылга “ТТЦР” ГУТ оптоволоконнай ситими Сунтаар улууһугар киллэрэрин уонна бастакынан Кириэстээх нэһилиэгэр МТС суотабай сибээс оператора 4G (LTE) сибээһи киллэрэргэ үлэлэһэрин туһунан иһитиннэрдэ.
Оскуола дириэктэрэ Павел Дмитриев начаалынай оскуолаҕа хапытаалынай өрөмүөнү туруорсар. Эбийиэк акылаата сытыйбыт, сууллар туруктаах, аҥаар өттө сабыллан турара этилиннэ. Кэпсэтиигэ “Кириэстээх” ТХПК дириэктэрэ Владимир Егоров: “Билигин эти оҥорон таһаарарга үөһэттэн көмө суох, инникитин бэйэ оҥорон таһаарар эккэ субвенция көрүллэн бэйэ сыанатын түһэрэр наада”, — диэн бэйэтин санаатын үллэһиннэ. Кириэстээхтэр СӨ Бырабыыталыстыбата ыытар үлэтин “биһириибит” диэн сыаналаатылар.
Салгыы отчуот Куокуну нэһилиэгэр турда. Бырабыыталыстыба бөлөҕө отчуот иннинэ быйыл агро хайысхаҕа үлэлээбитэ 25 сылын туолар Куокуну орто агрооскуолатыгар сылдьан хортуоппуй харайар сирдэри, тэпилииссэни, оҕо саадын көрдүлэр.
Дьон учуутал хамнаһа Единэй тарифнай сеткаҕа киириитин, бэнсиин сыаната тоҕо үрдүү турарын, кырдьаҕас, кыаммат дьоҥҥо дьиэ өрөмүөнүгэр туох көмө баарын, Бүлүү өрүс уутун ыраастыырга үлэ барарын-суоҕун, химическэй собуот тутуута ханна тиийбитин, бөрөнү бултааһын туһунан ыйытар. Химическай собуот Өлүөнэ өрүс үрдүгэр тутуллубат буолбутун, инвестордар атын сири (өрөспүүбүлүкэбит иһигэр) көрдүү сылдьалларын туһунан хоруй киирдэ. Куокуну олохтоохторо учуутал хамнаһа үөрэнээччи ахсаанынан суоттанара кыра оскуолаларга сөбө суоҕун иһин бу боппуруоһу көрөрү, оҕолор Дьокуускайга массыынанан, оптуобуһунан аара суолга хонон айанныыллара табыгаһа суоҕун иһин үөрэнээччилэри сөмөлүөтүнэн ыытары, тыа хаһаайыстыбатын граннарыгар агрооскуолалар кытталларын, МРТ аппараакка түһэргэ Мииринэйгэ направление биэрэри, банкоматы туруорустулар. “Оҕо саада икки сыллааҕыта эксперимент быһыытынан бойлерынан ититиигэ холбоммута. 70 кВт-таах бойлер төлө тэбэ, носуостар алдьана тураллар, ирдэбилгэ эппиэттээбэт буолан, дьон олоҕор кутталы үөскэтэр”, — диэн туран оҕо саадын сэбиэдиссэйэ Светлана Николаева эбийиэги ОДьКХ хочуолунайыгар холбууру туруоруста. Нэһилиэк кырдьаҕас олохтооҕо Клавдий Михайлов Бырабыыталыстыба үлэтин “биһириибин” диэн сыаналаабытын отчуокка кэлбит дьон бары сөбүлэстилэр.
Инвестиционнай сайдыы уонна предпринимательство миниистирин бастакы солбуйааччы Евгений Ноговицын салайааччылаах бөлөххө СӨ ойуурга сыһыаннаһыы департаменын салайааччыта Вячеслав Попов, үөрэх министиэристибэтин отдел салайааччыта Иннокентий Пинигин, үлэ уонна социальнай сайдыы министиэристибэтин социальнай бэлиитикэҕэ департаменын салайааччытын эбээһинэһин толорооччу Анастасия Прокопьева, экэниэмикэ министиэристибэтин территориальнай сайдыы департаменын салайааччыта Елена Игнатьева бааллар. Улуустан баһылык бастакы солбуйааччыта Николай Александров сырытта. Отчуот иннинэ бөлөх “Кириэстээх” ТХПК, Кириэстээх орто оскуолатын кэрийэн көрдүлэр.