Өлөөн табаһыт дьиэ кэргэнэ «Көс ыал-2017» күрэххэ үһүс миэстэ буолла

188

Сахабыт сирин килбэйэр киинигэр Туймаада хочотун дьоллоох туонатыгар Дьокуускай куоракка Россия Федерациятын табаһыттарын төрдүс, СӨ табаһыттарын үһүс съезтэрин иһинэн бу сыл кулун тутар 17 күнүгэр “Көс ыал- 2017 “ конкурс ыытыллан үрдүк таһымнаахтык ааста. Куонкуруска Өлөөнтөн эмиэ кытыннылар.


Быйылгы “Көс ыал -2017” күрэх Саха сиригэр биллэриллибит Ыччат, Россияҕа биллэриллибит Тулалыыр эйгэни харыстааһын сылларыгар ананан ыытылыбытынан уратылаах. Бүгүҥҥү күҥҥэ Өрөспүүбүлүкэҕэ 311 көс олохтоох ыал таба иитиитигэр көһө сылдьан үлэлиир. Ол аата табаһыт идэтэ билиҥҥи саҥа үйэҕэ техника балысханнык сайдар кэмигэр бэйэтин атын идэлэртэн итэҕэһэ суоҕун туоһулуур. Хас да үйэлэри уҥуордаан кэлбит өбүгэлэрбит төрүт дьарыктара — таба иитиитэ көс олохтоох табаһыттар омугуттан, үөрэҕиттэн тутулуга суох, араас тыллаах таба куттаах норуоттар аһыыр-таҥнар төрүт дьарыктара, духуобунай баайдарын быстыспат сорҕото буолар.

“Көс ыал-2017” күрэххэ өрөспүүбүлүкэ чулууттан чулуу көһө сылдьар дьиэ кэргэттэрин кытта тэҥҥэ илин-кэлин түсүһэн, үһүс миэстэҕэ Өлөөн улууһуттан «Өлөөн» МУТ 3 нүөмэрдээх таба иитэр ыстаадатын эдэр табаһыт ыаллара Милена Михайловна, Семен Семенович Алексеевтар таҕыстылар. Кинилэри эрэһиинэ тыынан бириэмийэлээтилэр.

Бу ыал үс көлүөнэ табаһыт династия, төрөппүттэрэ Елена Егоровна, Михаил Николаевич Федоровтар, Милена эбэтэ Анна Нифонтовна, эһэтэ Петр Васильевич Степановтар буолаллар.

Милена, Семен Алексеевтар Өлөөн улууһугар 2013 сыллаахха ыал буолан Сандра, Саяна, Сайдам диэн оҕолоохтор. Туундара киэҥ ньууругар буруо унаарытан, өбүгэлэрин үгэһин утумнаан, таба барахсан кутун төрөппүт оҕолоругар иҥэрэн көһө сылдьаллар.

Бастакы этапка Өлөөн табаһыт ыаллара Алексеевтар табаларын киэргэтэн, ойуу-мандар оһуордаах национальнай таҥастаах параадтаан көрдөрдүлэр. “Оримкэн” иккис түһүмэххэ ураһа көрүүтүгэр “Алакуо” этно-фольклорнай ансамбль кыттыылаахтара арыаллаах, эбэҥкилии национальнай бүлүүдэнэн ыалдьыттары күндүлээтилэр. Уус-уран оҥоһук эгэлгэтин көрдөрүүгэ туруордулар. Үһүс түһүмэххэ Хоту дойду киэҥ ньууругар дьиэ кэргэнинэн көһө сылдьар дьиэ кэргэн дьарыгын, төрүт үгэстэрин туһунан эбэҥкилии, сахалыы тылынан билиһиннэрдилэр. Эдэр аҕа Семен хоһуун табаһыт үҥкүүтүн бэрт имигэстик толордо. Төрдүс түмүктүүр түһүмэххэ ыал ийэтэ Милена бэйэтэ сайын үөрэттибит мииннэринэн дьахталларга куоталаһан иккис миэстэ буолла. Кыыстара аҕыс саастаах Сандра бэйэтиттэн төһө эмэ улахан оҕолору кытта куттаммакка тэбис-тэҥҥэ сүүрдэн ыалдьааччылары сөхтөрдө. “Алакуо” этно-фольклорнай ансамбль кыттыылаахтара күүс-көмө буоллулар, ыллаан-туойан, дьуохар үҥкүүтүнэн киэргэттилэр, элбэх көрөөччүнү көҕүлээн киэҥ түһүлгэни төрүттээтилэр.

Бу куонкуруска биһиги оройуоммут ситиһиилээхтик кыттыытын тэрйсибит дьоммутугар Марина Николаеваҕа, Майя Кондаковаҕа, Клара Кирилловаҕа, Васса Михайловаҕа, Надежда Прокопьевнаҕа, “Алакуо” этно-фольклорнай ансамбльга уо.д.а. махталбытын тиэрдэбит.

Бырааһынньыктыы киэргэммит түһүлгэҕэ ураһалар буруолара ыраахтан көстөн өргө диэри унаарда, эбээннии һээдьэ, эбэҥкилии дьуохар ырыалара ыраахха иһиллэ дьиэрэйдэ.