Мин эдэр үлэһиппин – Мин эдэр дьиэ кэргэммин!

159

«Мин эдэр үлэһиппин – Мин эдэр дьиэ кэргэммин» бэргэн этиилээх Сунтаар улууһун ыччат бэлиитикэтин салалтата сыллата тэрийэр «Мин эдэр исписэлииспит» көрүү күрэҕи уларыта тутан сонуннук ыыттылар.


Ыччакка туһаайыллыбыт быйылгы тэрээһиннэр бары да сонун көрүүлээхтэр. Эдэр үлэһит дьиэ кэргэн көрүү күрэҕэ саҥа тэриллэринэн Тойбохойтон, Сунтаартан, Элгээйиттэн, Бордоҥтон биэс дьоһун-мааны эдэр ыал көхтөөх кытыыны ылан, түөрт түһүмэххэ бастыҥнарын бигэргэттилэр. Саҥа саҕалыыр тэрээһин сүрүн бирииһэ да улахан. О курдук күрэх кыайыылаах ыалыгар «Жилище» тосхолго уочарата суох дьиэ тутталларыгар субсидия бэрилиннэ.

Тэрээһини эдэр ыаллар бэйэлэрин билиһиннэрэр быыстапкаларынан саҕалаатылар. Манна остуол хотойорунан ас, ыччаттар дьоҕурдарын көрдөрөр мал арааһа, дьиэ кэргэн оҕону иитэр­-үөрэтэр ньымаларын көрдөрүүтэ. Быыстапка кэннэ кэлбит эрэ бары саалаҕа киирэн эдэр үлэһит ыаллар бэйэлэрин билиһиннэриилэрин, талба талааннарын көрөн-истэн манньыйдыбыт. Бары да ырыаһыттар, эгэлгэ дьоҕурдаахтар эбит диэн сөхтүбүт уонна махтайдыбыт.

Үһүс түһүмэх бэйэтэ туспа уратылаах буолла. Бу түһүмэххэ ыаллар, эһиил 2017 – республикаҕа Ыччат сылынан биллэриллээри турарынан ыччакка аналлаах бырайыактары толкуйдаан кэлэн көмүскээтилэр. Манна ыччат скверин уонна түмэлин олохтооһун, волонтер хамсааһынын сайыннарыы, ыччакка балыктааһыны көҕүлээһин уонна ырыаһыт ыаллар күрэхтэрин тэрийии.

Эдэр ыаллар дьоро түһүлгэлэрин «Урай-айхал!», «Маладьыастар!» диэн киһини өрө тутар, көҕүлүүр ыалдьааччылар элбэхтэрэ сөхтөрдө. Улахан түһүлгэ түмүгүнэн, дьүүллүүр сүбэ быһаарыытынан бары ыаллар миэстэлэргэ тигистилэр:
Үһүс миэстэҕэ Тойбохтон Г.Бессонов аатынан түмэл үлэһиттэрэ Александра, Анатолий Семеновтар уонна Сунтаартан доруобуйа харыстабылын үлэһиттэрэ Туйаара, Сергей Прокопьевтар таҕыстылар, иккис миэстэҕэ Элгээйиттэн уот ситимин уонна уһуйаан үлэһиттэрэ Клара, Борис Яковлевтар уонна Сунтаартан бухгалтер, учуутал идэлээх Евгения, Михаил Слюсарьдар буолуллар.

Кыайыылаах үрдүк аатын Сунтаартан кыттыбыт гуманитарнай гимназия муусукҕа учуутала Алена уонна “Саха” НКИК Сунтаардааҕы филиалын оператор-монтажера Радомир Сергеевтар дьиэ кэргэттэрэ ылыан ыллылар! Сергеевтар күрэх саҕаланыаҕыттан бастыҥнара биллибитэ. Бордоҥтон үс тимир көлөнөн ыалдьааччылара кэлбиттэр. Бырайыактарын ымпыгар-чымпыгар тиэрдэн оҥорбуттарыттан да сылыктаатахха, улуус таһымнаах күрэххэ олус үчүгэйдик бэлэмнэнэн, бэйэлэрин дьоҕурдарын, сатабылларын көрдөрөн эдэр бастыҥ ыал аатын ыллылар! «Бирииспитинэн Сунтаар нэһилиэгэр А.Файрушина аатынан уулуссаҕа дьиэ туттар баҕа санаалаахпыт. Маннык күрэхтэр ыытыллаллара эдэр дьоҥҥо олус наадалаах. Олоххо көҕүлүүр аналлаах. Салалтабытыгар махтанабыт«, — диэтилэр Сергеевтар.