Сылын аайы халаан уута уонна ойуур баһаара нэһилиэктэргэ улахан долгутууну таһаарар.
Кураан дьыл кэмигэр өрөспүүбүлүкэ араас муннуктарыгар бииртэн-биир уот күөдьүйэр кутталлаах. Сүрүн төрүөтүнэн – киһи сыыһа-халты туттуута итиэннэ этиҥнээх ардахха чаҕылхан улахан кутталы үөскэтэр.
Ааспыт нэдиэлэҕэ Эбэ сайылыгар ойуур баһаарын умалларарга туһуламмыт өрөспүүбүлүкэтээҕи таһымнаах биир тиһиктээх дьарык буолан ааста. Манна тустаах тэрилтэлэр үлэһиттэрин, диспетчер үлэтин, техникаларынан төһө сөптөөхтүк туһаналларын Саха сиринээҕи ойуур сыһыаннаһыыларын Департаменын салайааччытын солбуйааччы Дьулустан Хон салайааччылаах хамыыһыйа сыаналаата.
Дьарык хаамыытынан, ходуһаны көрүүтэ-истиитэ суох өттөөһүнтэн ойуурга тахсыбыт уоту умуллардылар. Дьарыкка Намнааҕы ойуур хаһаайыстыбата, Дьокуускайдааҕы уонна Намнааҕы «Якутлесресурс» ГАУ, Саха сиринээҕи «Авиалесоохрана» ГБУ тэрилтэлэрэ, Намнааҕы 23 №-дээх баһаарынай сулууспа байыастара, Аппаанытааҕы ДПК үлэһиттэрэ, айылҕа харыстабылын иниспиэктэрдэрэ, улуус дьаһалтатын иһинэн тэриллибит ыксаллаах быһыыга-майгыга хамыыһыйа исписэлиистэрэ баһаар уотун бары ирдэбили тутуһан умуллардылар. Үлэһиттэр балаһыанньаны хонтуруолга ылалларыгар саҥа технологияны туһаннылар. Ол курдук үрдүктэн кэтииргэ квадрокоптер, баһаары түргэнник умулларарга «Чифарелли» диэн ааттаах уунан ыстарар тэрили тутуннулар.
Тиһиктээх дьарык хамыыһыйатын бэрэссэдээтэлэ Дьулустан Иванович Хон: «Маннык комплекснай дьарыктары сыл аайы улуустарынан ыытабыт. Былырыын Горнай улууһугар ыытыллыбыта. Намҥа буолбут дьарыкка ойуур баһаарыгар сыһыаннаах структуралар бары кыттыыны ыллылар. Тэрээһиннээхтик, эппиэтинэстээхтик, техникалары сөптөөхтүк туһананнар уоту умуллардылар. Бу буолбут дьарыгы үчүгэйинэн сыаналыыбыт», — диэн санаатын эттэ.