«Нам улууһа» МТ дьаһалтатын мунньахтыыр саалатыгар Саха АССР норуотун хаһаайыстыбатын үтүөлээх үлэһитэ, доруобуйа харыстабылын туйгуна, Нам уонна Кэбээйи улуустарын бочуоттаах гражданина, Аҕа дойду сэриитин иккис степеннээх, Үлэ Кыһыл Знамята, «Бочуот Знага» орденнар, үгүс мэтээллэр, ол иһигэр Монголия народнай республикатын мэтээлин кавалера Василий Егорович Колмогоров төрөөбүтэ 95 сылын бэлиэтээтилэр.
Василий Егорович Колмогоров 1922 сыллаахха тохсунньу 14 күнүгэр Кэбээйи оройуонугар төрөөбүтэ. 1943 сыллаахха фроҥҥа ыҥырыллан Ийэ дойдутун көмүскээбитэ. Сэрии кэнниттэн Дьокуускайдааҕы пединституту, онтон кэлин Үрдүкү партийнай оскуоланы бүтэрбитэ. 1961-1977 сылларга ССКП Намнааҕы райкомун секретарынан үлэлээбитэ. 1978 сылтан – Саха АССР Министирдэрин Сэбиэтин тэрийэр-инструкторскай отделын сэбиэдиссэйинэн, 1984-1991 сылларга Саха АССР Министэрдэрин Сэбиэтин Архивнай управлениетын инспекторынан үлэлээбитэ.
Тэрээһиҥҥэ «Нам улууһа» МТ баһылыга Александр Атласов, баһылыгы бастакы солбуйааччы Инна Сивцева, отделлар, управлениелар салайааччылара, нэһилиэктэр баһылыктара, Василий Егорович бииргэ алтыспыт дьоно-сэргэтэ, уола Государственнай юстиция бастакы кылаастаах советнига, СӨ уонна РФ үтүөлээх юриһа Василий Васильевич, аймахтара кыттыыны ыллылар.
Василий Егорович олорон ааспыт олоҕун, кэскили түстээбит сыралаах үлэтин, төрөөбүт улууһугар оҥорбут үгүс үтүөтүн туһунан улуус баһылыга Александр Атласов, улуустааҕы культура управлениетын сүрүннүүр специалиһа Матрена Платонова уонна улуус Ытык киһитэ, кыраайы үөрэтээччи Иннокентий Кривошапкин иһитиннэрии оҥордулар.