СӨ толоруулаах былааһын 2016 сыллааҕы отчуотун нэһилиэнньэ иннигэр туруора кэлбит оробуочай биригээдэ тохсунньу 31 күнүттэн олунньу 2 күнүгэр диэри Өлөөн эбэҥки национальнай оройуонугар үлэлээтэ. СӨ үлэ уонна социальнай сайдыы миниистирин солбуйааччы Светлана Анатольевна Сырова улуус олохтоохторун кытта көрсөн ирэ-хоро сэһэргэстэ, элбэх ыйытыыларга хоруй биэрдэ.
Үлэ бастакы күнэ Өлөөн сэлиэнньэтин олохтоохторун кытта көрсүһүүттэн саҕаланна. Нэһилиэнньэ элбэх ыйытыытыгар сүбэ-ама ылла. Сарсыныгар 350 км. сири кыһыҥҥы массыына суолунан айаннаан, Дьэлиҥдэ олохтоохторугар тиийдэ. Манна миэстэтигэр баар социальнай үлэһиттэри кытта олохтоохтор олорор, үлэлиир усулуобуйаларын билистэ, нэһилиэнньэни кытта көрүстэ уонна дьаһалта исписэлиистэрин кытта социальнай эйгэ боппуруостарын дьүүллэстэ.
Олунньу 2-с күнүгэр улуус киинигэр үлэлиир социальнай хайысхалаах тэрилтэлэр – оҕо киинэ, кырдьаҕастары көрөр-истэр киин уонна социальнай харалта оройуоннааҕы салаатын үлэһиттэрин кытта 2017 сыл сүрүн соруктарын толорууга аналлаах оробуочай мунньаҕы тэрийдэ. Маны сэргэ, Өлөөн уонна Харыйалаах олохтоохторугар тус көрсүһүү (личнэй прием) буолла. Тус көрсөн кэпсэтиигэ (приемҥа) оройуон таһымыгар быһаарыллыбатах боппуруостаах оройуон биэс олохтооҕо сылдьан, сөптөөх сүбэни-аманы, быһаарыылары ыланнар үөрэн-көтөн тарҕастылар.
Үлэ графига төһө да ыгымын иһин, Светлана Анатольевна нэһилиэнньэ саамай кыра дохуоттаах дьонун кытта көрүстэ. Күннээҕи олоҕу туоруурга элбэх быһаарыллыахтаах боппуруостаах араҥа бэрэстэбиитэллэрин, оройуоннааҕы кырдьаҕастар сэбиэттэрин бэрэссэдээтэлин көрсөн үүммүт сылга барар саҥа уларыйыылары билиһиннэрдэ. Социальнай эйгэ тэрилтэлэрин, олохтоох бэйэни салайыныы дьаһалталарын кытта нэһилиэнньэ кыаммат араҥатыгар өйөбүллэри олохтооһуҥҥа сүбэлэри биэрдэ.