Орто Халымаҕа — Экология уонна Ыччат сыллара

597

“Кулума” култуурунай киин кэллэктиибэ сонун тэрээһиннэринэн, киэҥ далааһыннарынан сөхтөрөр. Эдэр кэллэктиип хас биирдии ыытар тэрээһинигэр үрдүк эппиэтинэстээхтик уонна саамай сүрүнэ — көрөөччүнү интэриэһиргэтэр инниттэн кыһаллара өтө көстөр. Бу да сырыыга, олунньу 9 күнүгэр, быйылгы сыллары арыйар дьоро киэһэни үрдүк таһымнаахтык тэрийэн ыытта.


Хас биирдии нэһилиэктэн, куораттан эдэр ыччат дэлэгээссийэлэрин түмэн, биир сомоҕо буолалларын ситистэ. Инники кэскилбит — кэнчээри ыччаппыт буоларынан, төрөөбүт дойдуга таптал эдэр саастан олохтонорун толору өйдүүбүт. Итинтэн көстөрүнэн, тулалыыр эйгэҕэ харыстабыллаах сыһыан култуурата бу кэмнэртэн саҕыллыахтаах. Онон бу икки бэлиэ сылларбыт бэйэ-бэйэлэрин ситэрсэн биэриэхтээхтэр. Онуоха айылҕабыт чөл туруктаах буоларыгар ыччат көҕө хаһааҥҥытааҕар даҕаны наада. Ити курдук өйдөбүлүнэн бу күн сценаҕа Экология уонна Ыччат сылларын былаахтара өрө күөрэйдилэр, биир сомоҕо буоларга ыҥырар тыллар этилиннилэр, ону кытта улуус ыччатын күүһүнэн эҕэрдэ нүөмэрдэр толорулуннулар. Кинилэри ситэрэн, көлүөнэлэр солбуһууларын туоһутунан, бу үөрүүлээх киэһэ сцена бэтэрээннэрэ тахсан, көрөөччүлэри астыннардылар.