Дойдуга биллэриллибит Экология сылыгар бу салаа үлэһиттэрэ, чуолаан Айылҕа харыстабылын инспекциятын кэллэктиибэ, оскуолаларга сылдьан экология уруоктарын биэрдилэр.
Оҕолорго тыыннаах айылҕаны харыстыыр санааны иҥэрэр инниттэн, иниспиэктэрдэр улууска баар ураты харыстанар сирдэри, онно төрүүр-үүһүүр көтөрдөрү, хамсыыр харамайдары, үүнээйилэри хаартыскаларынан көрдөрдүлэр, кэпсээтилэр. Онон оҕолор төрөөбүт улуустарыгар ханнык үүнээйилэр, кыыллар, көтөрдөр Кыһыл кинигэҕэ киирбиттэрин биллилэр. Маны таһынан викторинаҕа кытыннылар, сэҥээрэр ыйытыыларыгар толору хоруйдары ыллылар.
Иниспиэксийэ начаалынньыга Иван Белоногов үлэ-хамнас туһунан кэпсээтэ: „Биһиги үлэбит биир сүрүн хайысхата — экологическай сырдатыы. Ол иһин, куруук буоларын курдук, үөрэх тэрилтэлэрин кытта ыкса сибээстээхтик үлэлиибит. Оҕо саадын кэллэктиибэ, оскуола үлэһиттэрэ, үөрэнээччилэрэ сылын аайы „Айылҕа уонна мин“, „Экология тиэргэнтэн саҕаланар“ курдук өрөспүүбүлүкэтээҕи куонкурустарга көхтөөхтүк кытталлар, бириистээх миэстэлэргэ тиксэллэр.
Быйыл даҕаны үгэс буолбут тэрээһиннэргэ бары үөрэ-көтө кыттыахпыт, ону таһынан улууска ылыммыт былааммытынан эмиэ тулалыыр эйгэбит туһугар үлэни дьүккүөрдээхтик ыытарга бэлэммит“.