Үрүҥ Хайаҕа «Алмаасэргиэнбанк» банкомата үлэлиэ

348

Кулун тутар 28 күнүгэр Үрүҥ Хайа олохтоохторугар үөрүүлээх бэлиэ түгэн үүннэ. Бу күн нэһилиэк «Бизнес-инкубаторын» дьиэтигэр «Алмаасэргиэнбанк» АХ банкоматын үөрүүлээх быһыыга-майгыга туруоруу буолла. Бу туһунан Үрүҥ Хайа долган национальнай нэһилиэгин баһылыга Алькенов Канат Ускенбаевич СИА-ҕа кэпсээтэ.


Билигин хамнас, оҕо босуобуйата, биэнсийэ барыта аныгы үйэ ирдэбилинэн анал банк картатыгар түһэр буолбута хаһыс да сыла. Онон олохтоохтор саас уонна күһүн, кыһыҥҥы суол суох кэмигэр улуус киинигэр кэлэн харчыларын ыларга күһэллэллэрэ, үгүс ыарахаттары көрсөллөрө. Буранынан киин сиргэ тиэстии кими да сыанан аҕаабата чахчы. Суолга араас быһылаан буолуон сөп.

«Хоту дойду халлаана иһийэн туран, эмискэ күүстээх буурҕанан охсуон сөп. Соҕотоҕун сылдьар айанньыттар муналлар, оччоҕо олохтоох дьаһалта хос ороскуотуран мунааччы дьону көрдүүргэ күһэллэрбитигэр тиийээччибит«, — диир баһылык Канат Алькенов.

Аны суол аһылыннаҕына чааһынай массыыналаах дьоҥҥо олорсон дьиэ кэргэн бюджетыгар биллэр ороскуоту көрсөллөр. Бу туһунан үрүҥ хайалар сыл аайы ыытыллар бырабыыталыстыба отчуотун кэмигэр кэпсииллэрэ, кыһалҕаны туоратарга туруорсаллара.

«Былырыын биһиги нэһилиэкпит курдук ыарахан суоллаах-иистээх Өлөөн улууһун Дьэлиҥдэ нэһилиэгэр, «Анаабыр Алмаастара» ААУо Сбербанк банкоматын туруорбуттарын истэн, тэрилтэ генеральнай директорыгар Павел Алексеевич Маринычевка тохсуньу ыйга Дьокуускай куоракка командировкаҕа сылдьан, Үрүҥ Хайаҕа банкомат туруоруутун туһунан сирэй көрсөн кэпсэппитим. Онно нэһилиэгим дьонун санаатын түмэн, Павел Алексеевичка сурун кыһалҕабын кэпсээн, ыллыктаах тылбын ылыннаран, тылтан докумуоҥҥа тиһиллэн олохтоохтор үөрүүлэригэр биһиги нэһилиэкпитигэр «Алмаасэргиэнбанк» АХ харчыны устар банкомата олоххо киирдэ», — диэн салгыы кэпсиир баһылык.

Банкомат нэһилиэк биир тупсаҕай оҥоһуулаах дьиэтигэр «Бизнес-инкубаторга» туруорулунна. Былаан быһыытынан почта эмиэ бу дьиэҕэ көһүөхтээх. Оччоҕуна нэһилиэнньэ бу банкоматынан араас электроннай өҥөлөрү туһанар кыахтанарын тустаахтар бэлиэтээтилэр.