Улууспут киинигэр «Проблемы и перспективы развития физической культуры и спорта в условиях модернизации системы подготовки спортивного резерва в Республике Саха (Якутия)» диэн өрөспүүбүлүкэтээҕи научнай-практическай конференция буолла.
Конференция биир дойдулаахпыт, медицина наукатын доктора, профессор, Арассыыйа наукаларын Академиятын Саха сиринээҕи научнай чинчийэр киинин төрүттээччитэ уонна бастакы дириэктэрэ, СӨ үтүөлээх бырааһа, ССРС спордун маастара, көҥүл тустууга РСФСР икки төгүллээх чөмпүйүөнэ, Сунтаар улууһун Бочуоттаах гражданина Алквиад Исидорович Иванов төрөөбүтэ 75 сылыгар уонна кини аатын сүгэр олимпийскай эрэллэри бэлэмниир оҕо спортивнай оскуолата тэриллибитэ 10 сылыгар ананна.
Сунтаардааҕы технологическай колледж аактабай саалатыгар спорду сэҥээрэр, спорка олохторун анаабыт дьон кэккэтигэр А.Иванов кэргэнэ, РСФСР уонна Саха АССР үтүөлээх артыыската Клавдия Иванова, көҥүл тустууга Арассыыйа түөрт төгүллээх чөмпүйүөнэ, XXVI Атлантатааҕы Олимпийскай оонньуулар кыттыылаахтара, ХИФУ доцена Владимир Торговкин, көҥүл тустууга Азия чөмпүйүөнэ, быйылгы Рио-де-Жанейротааҕы Олимпийскай оонньуулар кыттыылаахтара Айаал Лазарев, оҕунан ытыыга Арассыыйа сүүмэрдэммит хамаандатын чилиэннэрэ: Аан дойду кубогын хаһаайката, Арассыыйа чөмпүйүөнэ Кристина Тимофеева, Арассыыйа хас да төгүллээх чөмпүйүөнэ Степанида Артахинова, уо.д.а. кытыннылар. Долгутуулаах тэрээһини Сунтаар улууһун баһылыгын социальнай уонна имиджевай бэлиитикэҕэ солбуйааччы Ульяна Попова үөрүүлээхтик аста. Кини улууска спорт инники сайдыытыгар ыытыллар үлэлэри сырдатта, мэһэйдэри хайдах быһааралларын эттэ. Ытыс тыаһыгар доҕуһуоллатан «Художественное наследие Сунтарского улуса» альбом-кинигэни Кристина Тимофееваҕа, Степанида Артахиноваҕа, Айаал Лазаревка бэлэхтээтэ. Өрөспүүбүлүкэтээҕи научнай-практическай конференция спорт сайдыытыгар киэҥ аартыгы арыйдын диэн туран кыттыылаахтар Сергей Зверев-Кыыл Уола тоҕус мэҥэ хамсаныытынан алгыстаннылар. Далааһыннаах тэрээһин салгыы түөрт секциянан үлэлээтэ.
Эбиэт кэннэ А.Иванов аатынан олимпийскай эрэллэри бэлэмниир оҕо анал оскуолатын манеһыгар спорт маастардара, тренердэр, Олимпийскай оонньуулар кыттыылаахтара биирдиилээн көрүҥнэргэ маастар-кылаастары ыыттылар. Дьон-сэргэ улаханнык сэҥээрэн, сэргээн, астынан кытынна.