Бу нэдиэлэҕэ Сунтаар улууһугар биир дойдулаахпыт, СӨ Конституционнай суутун судьуйата, СӨ үтүөлээх юриһа, Сунтаар, Таатта оройуоннарын Бочуоттаах гражданина Игорь Николаев үлэлээн барда. Кини Конституционнай суут нэһилиэнньэҕэ ыытар үлэтин, сүрүн боломуочуйаларын билиһиннэрдэ.
Игорь Игнатьевич улуус дьаһалтатын үлэһиттэрин сэргэ нэһилиэнньэни, оскуола үөрэнээччилэрин кытары көрүстэ. Ол курдук ааспыт оптуорунньукка кини Сунтаардааҕы политехническай лиссиэй-интэринээт үрдүкү кылааһын үөрэнээччилэрин кытта көрүстэ. Онно сүрүннээн юрист идэтин туһунан кэпсээтэ. Элбэх сүбэни биэрдэ. Бу идэни толору баһылыырга ханнык хаачыстыбалар наада буолуохтарын ыйда.
И.И.Николаев 1948 сылга Бүлүүчээн нэһилиэгэр төрөөбүтэ. 1975 с. Харьковскайдааҕы юридическай институту бүтэрбитэ. Эдэр исписэлиис үлэтин Ис дьыала уорганнарыттан саҕалаабыта. Ол кэннэ хас да сыл норуот хаһаайыстыбатын араас салаатын тэрилтэлэригэр юрист-консультанынан үлэлээбитэ. Онно үлэлиир кэмигэр улахан уопуту мунньуммута. Олортон саамай сүрүннэринэн, бэйэтэ этэринэн, ханнык баҕарар киһини кытта биир тылы булааһына буолар. Ити хаачыстыбата инники үлэтигэр олус көмөлөспүтэ.
1987 сылга кинини Орто Халыматааҕы оройуоннай суут судьуйатынан талаллар. 1990 сылтан Мэҥэ Хаҥаластааҕы оройуоннай суут судьуйата. Ол кэннэ Мииринэй куорат суутун судьуйатынан талаллар. Онтон 1994 с. кулун тутарыгар СӨ Үрдүкү суутун судьуйатынан талыллыбыта. 2016 с. алтынньы 25 күнүгэр СӨ Ил Дархана Е.А.Борисов СӨ Конституционнай суутун судьуйатын дуоһунаһыгар Ил Түмэҥҥэ кини кандидатуратын киллэрбитин дьокутааттар ылыммыттара.