Ил Түмэн дьокутааттара, биир дойдулаахтарбыт Александр Уаров уонна Семен Березин Дьокуускайтан Сунтаарга кэлэн, улуус дьаһалтатын дьиэтигэр тэрилтэ салайааччыларын кытта көрүстүлэр.
Улуустааҕы үөрэҕирии управлениетын начаалынньыга Г.Еремеевы уонна Тойбохой нэһилиэгин баһылыга С.Егоровы көрсөн туох кыһалҕалаахтарын билистилэр, туруорсар боппуруостарын суругунан ыллылар. Тойбохой нэһилиэгин күннэрин Дьокуускайга бэлиэтээһиҥҥэ биир дойдулаахпыт, Тойбохойтон төрүттээх, Ил Түмэн дьокутаата, ХИФУ ректора Е.Михайлованы кытары төлөпүөнүнэн сибээстэстилэр.
Улуустааҕы кииннэммит балыыһа кылаабынай бырааһа С.Иванова доруобуйа харыстабылын үлэһиттэрэ хайдах үлэлии олороллорун билиһиннэрдэ. Кэпсэтии түмүгэр таас балыыһа иккис уочаратын туттарыыны кимиилээхтик туруорсуохха диэн сүбэ-ама ылла. Ити кэнниттэн Элгээйи нэһилиэгин баһылыга Г.Михалеву уонна тыа хаһаайыстыбатын управлениетын начаалынньыга И.Тихоновы кытта эһиил тэриллибитэ 50 сылын туолар Ленин уордьаннаах «Элгээйи» сопхуос үбүлүөйүн хайдах тэрийэри быһаарыстылар. Г.Михалевтаах И.Тихонов сүрүн туруорсууларын эмиэ суругунан киллэрэр буоллулар. Салгыы «Бартыһаан» култууратын дьиэтигэр буолбут Сунтаар телевидениетин 25 сыллаах үбүлүөйүгэр Александр Уаров икки үлэһиккэ Ил Түмэн наҕараадаларын туттарда.