Саха биллиилээх суруналыыһа, суруйааччыта улуу тустууктар Дмитриевтэр тустарынан кинигэ суруйар.
Иван Ушницкай Эдьигээҥҥэ кэлэн, саха тустуутун аар саарга аатырдыбыт Роман, Гавриил Дмитриевтэр тустарынан суруйа сылдьар кинигэтигэр матырыйаал хомуйан эрэр. Кини манна кэлээт, Эдьигээн оройуонун дьаһалтатын баһылыга Алексей Мандаровы кытта көрүстэ. Кинигэ сүрүн тосхоллорун, ис хоһоонун, сыалын-соругун туһунан кэпсэттилэр. Оройуон баһылыга улуу спортсменнар, чуолаан Гавриил Михайлович туһунан кинигэ тахсыыта биһиги оройуон олохтоохторугар ураты суолталааҕын эттэ уонна Эдьигээн төрүттэммитэ 385 сылыгар кэрэхсэбиллээх бэлэх буолуоҕа диэн бэлиэтээтэ. Салгыы баһылык кинигэ тахсыытын суолтатын өйдөөн, дьаһалта өттүттэн бэчээттэниитигэр көмө оҥоруохпут диэн эрэннэрдэ. Онно бүддьүөт харчытын ороскуоттаабакка, анал куонкурустарга, граннарга кыттан, кыайан ылбыт үбү туттар туһунан эттэ, суруйааччыга айымньылаах үлэтигэр ситиһиилэри баҕарда.
Иван Ушницкай билигин кинигэ хайдах сурулла сылдьарын билиһиннэрдэ. Онно Гавриил Михайловиһы олоҕун, кинини чаҕылхай тустуук, кыахтаах спортсмен, ураты майгылаах киһи быһыытынан кырдьыктаахтык толору арыйан, докумуоннарга, хаартыскаларга олоҕуран суруйарын бэлиэтээтэ. Дьокуускайга, атын улуустартан балачча матырыйаал хомуллубутун, билигин Эдьигээҥҥэ өссө эбии информацияны хомуйа, чуолкайдаһа кэлбитин эттэ. Онуохаҕа бырааттыы Дмитриевтэри, кинилэр дьиэ кэргэттэрин кытта алтыспыт билэр дьону көрсүөн, билсиэн баҕарарын биллэрдэ.
Иван Ушницкай чаҕылхай суруналыыс, суруйааччы, уопсастыбаннай диэйэтэл быһыытынан биллэр, СӨ култууратын үтүөлээх үлэһитэ, Саха сирин, Россия суруйааччыларын Сойуустарын чилиэнэ, норуоттар икки ардыларынааҕы бириэмийэлэр лауреаттара, СӨ маҥнайгы бэрэсидьиэнин М.Е. Николаев көмөлөһөөччүтүнэн үлэлээбитэ.