Сунтаар улууһугар Тыа сирин үлэһиттэрин сылын чэрчитинэн тыа сирин үлэһиттэрин ортолоругар идэҕэ бастыҥнары талар күрэстэр ыытыллаллар.
Бу сырыыга Күндэйэ нэһилиэгин Таас сайылыгар ыанньыксыттар илин-кэлин түсүһүүлэрэ буолан ааста.
Бу «Бастыҥ ыанньыксыт» диэн ынах ыыр аппарат оператордарын күрэһигэр «Кириэстээх», «Лоҥкур» уонна «Сырдык Аартык» хаһаайыстыбалартан 9 киһи кытынна. Манна Сунтаар улууһун тыа хаһаайыстыбатын управлениетын начаалынньыга И.В. Тихонов бэрэссэдээтэллээх, начаалынньыгы солбуйааччы Н.И. Корнилова, улуус кылаабынай зоотехнига М.М. Яковлева, Күүкэй нэһилиэгин т/х исписэлииһэ Л.А. Львова, Туойдаах нэһилиэгин т/х исписэлииһэ М.Н. Тотонова чилиэннэрдээх дьүллүүр сүбэ үлэлээтэ. Кириэстээхтэн биир идэлээхтэрин көрө кэлбит рекордсмен-ыанньыксыт, Үлэ Албан аат уордьан толору кавалера, Бочуот уордьан кавалера Владимир Михайлов, «Сырдык Аартык» кэпэрэтииптэн Саргылаана Алексеева, «Лоҥкур» хаһаайыстыба эдэр ыанньыксыта Наталия Попова күрэс былааҕын таһаарбыттарын кэннэ кыттааччылар биир-биир бэйэлэрин билиһиннэрдилэр.
Бастакы түһүмэҕинэн теоретическай ыйытыыларга хоруйдааһын буолла. Кыттааччылар билиэти тардан ылан, үс араас ыйытыыга сөптөөх хоруйу таллылар. Манна Саргылаана Алексеева (Күндэйэ), Елизавета Никифорова (Кириэстээх), Наталия Попова (Сунтаар) уонна Семен Анисимов (Сунтаар) сөптөөх хоруйу биэрэн инники таҕыстылар.
Иккис түһүмэххэ бириэмэҕэ ынаҕы ыыр аппаараты таҥыы буолла. Маны сэргэ, дьүүллүүр сүбэ үрүҥ илгэни дэлэтээччилэри санитарнай ирдэбилгэ сөп гына таҥна-сапта, ыраастык тутта-хапта сылдьалларын сыаналаата.
Саҕалыах иннинэ рекордсмен-ыанньыксыт Владимир Африканович кыттааччыларга ыыр аппараты хайдах ыһарга, таҥарга маастар-кылаас көрдөрдө.
Бастыҥынан сатабыллаахтык туттан Вячеслав Петров (Күндэйэ) ситистэ – 2 мүн. 58 сөк. Күрэс саамай эдэр кыттааччыта, «Лоҥкур» хаһаайыстыба ыанньыксыта, 16 саастаах Семен Анисимов түргэн туттуутунан иккис үчүгэй бириэмэлэннэ – 3 мүн. 2 сөк.
Үһүс түһүмэххэ аппараатынан ынах ыатылар. Киэһээҥи ыамы көһүтэн Таас сайылыгын олохтоохторо күрэс кыттааччыларын, тэрийээччилэрин, көрө кэлбит ыалдьыттары минньигэс астарынан күндүлээтилэр. Сайылыкка мустубут дьон мээчиктээн, ыллаан-туойан, оһуохайдаан, бириэмэлэрин үөрэн-көтөн атаардылар.
Түмүктүүр түһүмэххэ дьүүллүүр сүбэ күрэстэһээччилэр аппараттарын, ынахтарын ыамҥа сөпкө бэлэмнииллэрин, бириэмэлэрин, төһө үүтү ыабыттарын көрдүлэр. Ынахтар үгүс дьон тоҕуруоруспутуттан үүттэрин көҥөөн үчүгэйдик ыаппатылар.
Бары түһүмэхтэр түмүктэринэн «Лоҥкур» хаһаайыстыба эдэр ыанньыксыта Семен Анисимов 99 баалы ылан III миэстэ буолла. II миэстэҕэ Владимир Африканович олоҕун аргыһа, «Кириэстээх» ТХПК үлэһитэ Елизавета Никифорова (99,5 баал) таҕыста. Онтон «Бастыҥ ыанньыксыт» аат уонна улуус баһылыга туруорбут 50000 солк. суумалаах сэртипикээт хаһаайынынан, сүүстэн 100 баалы ылан, «Сырдык Аартык» кэпэрэтиип ыанньыксыта Саргылаана Алексеева буолла.
Сунтаар улууһун салалтата маннык күрэстэри ыытарын, тыа сирин боростуой үлэһиттэригэр болҕомто уурарын дьон-сэргэ биһириир, хас күрэс кэннэ махталларын биллэрэр.