Өрөспүүбүлүкэбитигэр нэһилиэнньэлээх пууннары тупсаран оҥоруу сылыгар элбэх үлэ барар. Маныаха бу сыл чэрчитинэн Сунтаар улууһугар аҕыс нэһилиэк грант ылан, ылбыт үптэрин тус аналынан туһанан, араас хабааннаах үлэни ыыттылар.
Дьаархаттар уулуссаларбытыгар барытыгар лаампа ыйанан, киэһэ хараҥаҕа сылдьарбытыгар олус бэрт буолла диэн астыналлар. Ону сэргэ, быйыл икки уулуссаны оҥорон, улахан кыһалҕаларын быһаардылар. Суол оҥоруутугар олохтоох ИП А.Степанов биригээдэтэ үтүө суобастаахтык үлэлээтэ. Тиэхиньикэ баар буолан, ыарахаттары көрсүбэтэхтэрин туһунан нэһилиэктэрин салалтата этэр.
Нэһилиэк киэн туттар дьонун ааттара үйэтитиллэн, көмүс буукубаларынан суруллубут дуоскалаах «Үс Кут» сквер тутуута аны сайын ситиэхтээх-хотуохтаах. Манна олохтоохтор сынньанар, оҕолор дуоһуйа оонньуур анал былаһааккалара былааннанан оҥоһуллар. Түгэнинэн туһанан эттэххэ, бу кыра нэһилиэккэ оҕо оонньуур иккис былаһаакката тутуллар. Ол курдук, бу иннинэ «Саһарҕа» түөлбэ бырайыак көмүскээн, улуус 200 тыһыынча солкуобайдаах гранын ылан, бэйэлэрин түөлбэлэригэр оҕо былаһааккатын туппуттара.