Улуус олоҕо: Бэс Күөлүгэр олорор Сахамин ураты талаанын биир дойдулаахтара киэн тутта кэпсииллэр

828

«Сахамедиа» холдинг «Улуус олоҕо» бырайыагын чэрчитинэн Горнай улууһун дьонун-сэргэтин кытта көрсүһүүбүтүн салгыыбыт. Тыа сирин ньир-бааччы олоҕо киһи сүргэтин көтөҕөр. Ордук дьон көҕүттэн, оҕолуун-кыралыын айар-тутар ураты дьоҕурдаахтарыттан үөрдүбүт.


Сахалыы ааттаах Сахамин бэйэтин сааһыгар сөбө суох боччумнаах уол. Кини Бэс Күөлүн үһүс кылааһын үөрэнээччитэ. Ахсаан курдук ыарахан предмеккэ “4” уонна “5” сыанаҕа үөрэнэр. Ол эрээри саха тылын уруогун быдан ордорорун кэпсиир. Остуоруйа ааҕарын, мультипликационнай киинэлэри көрөрүн сөбүлүүр.

Уолчаан биир сөбүлүүр дьарыктаах. Ол – пластилинынан араас кыылы-сүөлү, киинэ, кинигэ геройдарын оҥорор. Имигэс илиилэр пластилины араастаан мускуйаллар. Ол аайы саҥаттан саҥа оҥоһук тахсан иһэр. Интэриэһинэйэ диэн Сахамин бу оҥоһуктара олус бытархайдар, маҕаһыыҥҥа атыыланар конструктордарга маарынныыллар. Мин бу талааннаах оҕо оҥоһуктарын көрө туран, арааһа, улааттаҕына алмааһы кырыылааччы буолара буолуо дии санаатым.

Мин бэйэм айан оҥорорбун сөбүлүүбүн. Пластилин дьоруойдарым сорохторо мульткиинэлэртэн ылыллыбыттара. Онтон үтүктэбин. Билигин 126 оҥоһуктаахпын. Мин коллекциябар чоппуускалар, динозаврдар, ойуур кыыллара элбэхтэр. Тоҕо эрэ харахпар хаһан даҕаны көрбөтөх динозаврдарбын сөбүлүүбүн. Ийэлээх аҕам бу дьарыкпын олус өйүүллэр. Улааттахпына тутааччы буолуом. Үчүгэй, дьоҥҥо туһалаах үлэ дии саныыбын. Үчүгэй дьиэни тутан таһаарыам буоллаҕа. Пластилинтан оҥорорум туһалаах, буочарым олус тубуста, — диэн кэпсээтэ бэрт улахан киһилии Сахамин Павлов.