Улуус олоҕо: Олоҥхо дойдутун оҕото Надя Дьяконова Аммаҕа олорор

647

А.А.Черемных аатынан Амматааҕы оҕо искусствотын оскуолатын саҥа таас дьиэтэ Амма сэлиэнньэтин киэргэтэр тутуулартан биирдэстэрэ. Манна улуус ырыаҕа-тойукка, үҥкүүгэ-битиигэ дьоҕурдаах оҕолоро дьарыктаналлар. Кинилэри кытта Надя Дьяконова эмиэ үөрэ-көтө үөрэнэр. «Улуус олоҕо» бырайыак суруналыыстара олоҥхоһут кыыһы кытта көрсөн кэпсэттибит.


Эбии үөрэхтээһин преподавателэ Анисия Даниловна Софронова олоҥхону толоруу маастарыстыбатыгар 15 оҕону уһуйар. Кини саамай киэн туттар үөрэнээччитэ – Надя Дьяконова. Сытыы сирэйдээх-харахтаах, чобуо тыллаах-өстөөх кыысчаан Бөтүҥ орто оскуолатын уонна Оҕо искусствотын оскуолатын 2-с кылаастарыгар үөрэнэр, үөрэх туйгуна.

Манна сыһыаран эттэххэ, Анисия Даниловнаҕа дьарыктанар оҕолор бары – бөтүҥнэр, “Оллоон” ансаамбылга сылдьаллар. Сэтинньигэ Москваҕа “Сохраняем традиции” диэн Бүтүн Россиятааҕы фестивальга кыттан, ансаамбыл II степеннээх лауреат буолан, аны сайын Болгарияҕа ыытыллыахтаах аан дойду чемпионатыгар кыттар быраабы ылбыт. Өссө онно кыттарга усунуос буолар 300 евро суумалаах сертификаты туттаран ыыппыттар. Үбэ-харчыта быһаарылыннаҕына барыахтаахтар.

Оттон биһиги кэпсиир кыысчааммыт ол фестивальга I степеннээх лауреат буолбут. Надя Дьяконова алта саастааҕыттан өрөспүүбүлүкэни “аймаабыт”: “Олоҥхо дойдутун оҕотобун” фестиваль саамай улахан бирииһин ылбыт. Онтон биир сыл кэнниттэн ити фестивальга I степеннээх дипломант аатын биэрбиттэр. Ааспыт сайын Дьааҥыга ыытыллыбыт Олоҥхо ыһыаҕар олоҥхолоон, III степеннээх уонна Майаҕа “Зов земли Олоҥхо” өрөспүүбүлүкэтээҕи фестивальтан I лауреат буолан эргиллибит.

Надя аҕатынан хос эһэлэрэ, Чурапчы Сылаҥын дьоно Михаил Михайлович уонна Николай Михайлович Дьяконовтар олоҥхоһуттар үһү. Онон эһэлэрин утумнаабыт-удьуордаабыт буолуон сөп. Анисия Даниловна этэринэн, аҥаардас баҕа санаа күүһүнэн дьарыктанан элбэҕи ситиспэккин, Надя – айылҕалаах, олоҥхолуурга ананан төрөөбүт оҕо.

Олоҥхоһут кыысчаан куораттан тиийбит ыалдьыттарга Устин Нохсоров “Дыырай Бэргэн” олоҥхотуттан быһа тардан иһитиннэрдэ. Бухатыыр атын ырыатын толордо. “Туойсууну, кылыһахтатан ыллыыры дьарыктаммыт оҕо барыта сатыыр. Оттон ат ырыатын толорор олус уустук. Надя эрэ кыайар”, — диэн быһаарда учуутала Анисия Даниловна.