«Аартыктарынан айан» ыччат фольклорнай айанын суолуттан уус алданнар улаханнык астынан, сэргэхсийэн олороллор. Итиннэ эдэрдэр туруммуттара улаханнык үөрдүбүт. Десант кыттыылаахтара нэһилиэктэр олохтоохторун, кэнчээри ыччаттарын олоҥхоҕо, тойукка, чабырҕахха, хомуска, дэгэрэҥ, норуот ырыаларыгар, оһуохайга, фольклорга уһуйбуттар, ытык дьонтон сүбэ-саргы ылбыттар. Бу туһунан десаны сүрүннээччи СӨ лидер кыргыттар түмсүүлэрин култуураҕа салаатын салайааччы Алина Герасимоваттан ыйыталастыбыт.
—Улуустааҕы Олоҥхо Ассоциациятын, култуура управлениетын тэрийиилэринэн, норуот тылынан уус-уран айымньытын тарҕатыыга ыччат фольклорнай айанын суола саҕаланна. Десаҥҥа улуус фольклорга сыһыаннаах ыччатын түмэн, барыта 13 буолан сырыттыбыт. Бу аан бастакы саҕалааһын. Онон маннык сырыыга-айаҥҥа сылдьан, хата, бэйэбит элбэххэ үөрэннибит, улахан үөрүйэхтээх аҕам саастаах дьону көрсөн атах тэпсэн олорон ирэ-хоро сэһэргэстибит.
Бэйдиҥэҕэ, Бээрийэҕэ, Кэптэнигэ олус истиҥ, сэргэх көрсүһүүлэр буоллулар. Кэнсиэрдээтибит, маастар-кылаастары ыыттыбыт, нэһилиэнньэ санаатын иһиттибит, сүбэ ыллыбыт. Маныаха дьон-сэргэ, эдэр ыччат, оскуола үөрэнээччилэрэ олоҥхоҕо, тойукка, чабырҕахха, хомуска, дэгэрэҥ ырыаҕа, норуот ырыатыгар, оһуохайга, үөрэнэргэ, кыттыһарга баҕалаахтара эппиэтинэстээх айаммытын кынаттаата, санаабытын улаханнык көтөхтө. Бу туһалааҕынан уонна наадалааҕынан дьарыктана сылдьарбытын туоһулаата диэн астынныбыт.
«Ыччат оруола билиҥҥи олоххо» төгүрүк остуол тула санаа атастаһыытыгар, бу «Аартыктарынан айан» десант саамай сөптөөх кэмигэр тэриллибитин бэлиэтээтилэр. Маннык хабааннаах көрсүһүүлэри, ыалынан, тэрилтэнэн олоҥхолооһуну биһирииллэрин биллэрдилэр. Тэрээһиҥҥэ ХИФУ Олоҥхо институтуттан Юрий Борисов кыттыбыта улахан сэргэхсийиини таһаарда. Айаммытыттан-сырыыбытыттан көрдөххө, атах тэпсэн олорон сэһэргэһэр, бииргэ ыллыыр-туойар, хомустуур, олоҥхолуур киһини хайдах эрэ уратытык уһугуннарар, күүһү-уоҕу биэрэр курдук буолар эбит. Кэккэлэһэ олорор истээччилэр, көрөөччүлэр сэҥээрэллэрэ, толорооччуга тирэх буолар. Ураты истиҥ эйгэ үөскүүр, — диэн кэпсээтэ Алина.
Десаҥҥа сылдьыбыт эдэр дьон билбэтэхтэрин билэн, истибэтэхтэрин истэн улаханнык сэргэхсийбиттэр. Бу хамсааһыннара салҕанарыгар, кэнчээри ыччакка умнуллубуттык иҥиэҕэр эрэнэллэрин биллэрдилэр.