Сунтаар улууһугар тэриллибит “Олоҥхо дойдутун оҕотобун” өрөспүүбүлүкэтээҕи креативнай лааҕыр иккис сезона түмүктэннэ. Манна оҕолор хомус уонна үҥкүү хайысхаларынан дьарыктаннылар. Сезон устата барыта 45 оҕо сырытта.
Хомуска оҕолору СӨ култууратын туйгуна, Сунтаар улууһугар хомуска оонньууну сүрүннээччи Никитина Антонина Константиновна уһуйда. Манна өссө Уһун Күөлтэн “Алаас оҕолоро” ансаамбыл кыттыылаахтара кэлэн, бэйэлэрин маастарыстыбаларын үрдэтиннилэр. Ону таһынан хомуска саҥа оонньуур оҕолор эмиэ бааллар. Кинилэр бу 10 хонук иһигэр хомуска сыыйа тардыыга үөрэннилэр, араас сахалыы матыыптары таһаарар буоллулар. Итини таһынан Сунтаардааҕы «Олоҥхо» төрүт култуура киинин исписэлиистэрэ Васильева Галина Михайловна уонна Сергеева Елена Сергеевна оҕолору сахалыы норуот ырыатыгар, чабырҕахха үөрэттилэр.
Үҥкүүгэ “Түһүлгэ” үҥкүү ансаамбылын салайааччыта Слепцова Василина Александровна дьарыктаата. Оҕолор хас да үҥкүүнү үөрэттилэр: «Доҕордоһуу үҥкүүтэ», аныгылыы үҥкүү, «Алгыс үҥкүүтэ». Уопсай үҥкүүлэри тас өттүнэн лааҕыр иитиллээччилэрэ бэйэлэрэ үҥкүүлэри туруордулар. Манна араас омук үҥкүүтэ баар: индийскэй, кытай, илиҥҥи омуктар, эбэҥки, хотугулуу, американскай уо.д.а.
Өссө бальнай үҥкүүлэри сатыыр буоллулар. Ол түмүгүнэн лааҕырдарыгар бальнай үҥкүү күрэһин ыыттылар. Күрэс юниордар уонна кадеттар диэн икки бөлөххө арахсан барда. Юниордартан 8 паара, кадеттартан 7 паара туран, бэйэ-бэйэлэрин кытта биэстии бальнай үҥкүүнү толорон, күөн көрүстүлэр. «Падеграс», «Якутяночка», «Полька», «Фигурный вальс» уонна «Вару-вару» үҥкүүлэри толордулар. Түмүктүүр түһүмэххэ түөртүү паара таҕыста. Ол түмүгүнэн кыайыылаахтар билиннилэр. Кинилэр бары мэтээлинэн, сыаналаах бириистэринэн наҕараадаланнылар.
Сүрүн дьарыктарын таһынан лааҕырдарыгар атын тэрээһиннэр эмиэ буоллулар. Ол курдук кыргыттарга “Хомус Куо”, “Мисс лагеря – 2017”, уолаттарга “Тимир көлө”, “Эр Хоһуун” күрэхтэр бэрт сэргэхтик, эрийсиилээхтик бардылар. Пионерболга, көрдөөх эстэпиэтэҕэ хас биирдии оҕо кыттан, бэйэтин кыаҕын, сымсатын көрдөрдө. Итини таһынан “День рекордов”, “Мыльный день”, “Хеллоуин”, “День наоборот” уо.д.а. тэрээһиннэр олус интэриэһинэйдик ыытылыннылар. Манна барытыгар лааҕыр хас биирдии иитиллээччитэ кытынна. Өссө өйү сайыннарар, билиини тургутар араас биктэриинэлэр, дуобат күрэҕэ, бэйэ дьоҕурун көрдөрөр уруһуй быыстапката, айылҕа матырыйаалыттан авангарднай муода көрдөрүүтэ буоллулар.
Оҕолор Күүкэй кэрэ-бэлиэ сирдэригэр сырыттылар, учуутал Самсоновтар мусуойдарыгар ыалдьыттаатылар. Маны барытын иитээччилэрэ Олимпиада Андреевна иилээтэ-саҕалаата.
Сезон түмүгэр оҕолор туохха үөрэммиттэрин, уһуйуллубуттарын улахан кэнсиэр оҥорон Күүкэй нэһилиэгин олохтоохторугар уонна ыалдьыттарыгар көрдөрдүлэр.
