Метка: Тыа сирин үлэһиттэрин сы­ла

Соторутааҕыта «Олоҥхо» төрүт култуура киинигэр Тыа сирин үлэ­һиттэрин сылын чэрчитинэн, «Бас­тыҥ муниципальнай сулууспа­лаах» көрүү-күрэс буолан ааста. Кыайыылаах улуус баһылыгын 50 тыһ. солк. суумалаах Гранын ылла.

---

Күрэскэ барыта 10 киһи кытын­на. Бары дьаһалта үлэһиттэрэ, сүрүннээн исписэлиистэр. Улуус дьаһалтатыттан Юрий Васильев, Ньургуйаана Федорова, Гульнара Будищева, Наахара нэһилиэгин дьаһалтатын исписэлииһэ Зоя Максимова, Тэҥкэ нэһилиэгин баһылыгын сол­буйааччы Анна Петрова, Дьаархан нэһилиэгин баһылыгын солбу­йаач­чы Августина Тихонова, Арыы­лаах нэһилиэгин дьаһалта­тын исписэлииһэ Татьяна Григо­рьева, Сунтаар нэһилиэгин испи­сэлииһэ Ньургуйаана Илларио­нова, Кириэстээх нэһилиэгин ба­һылыгын солбуйааччы Владимир Анисимов уонна Элгээйи дьаһал­татын исписэлииһэ Алена Филип­пова бааллар.

Күрэс түөрт түһүмэхтэн турда. Бастатан туран, улуус дьаһалтатын дьыалаларын бэрийээччи Нико­лай Егоров салайар дьүүллүүр сүбэ чилиэннэрэ кыттааччылар бэйэлэрин билиһиннэрэр истиэн­дэлэрин көрөн сыаналаатылар. Манна кинилэр бэйэлэрин дьа­рык­тарын арылхайдык көрдөрөр экспонаттары дьон дьүүлүгэр туруорбуттар. Ордук интэриэһи­нэйинэн биир кыттааччы араас омук дойдуларын харчытын мун­ньубута буолар. Сорох араас тиэ­мэҕэ значоктары мунньар эбит.
Иккис түһүмэҕинэн бэйэни билиһиннэрии буолла. Манна үгүстэр дьиэ кэргэннэрин кытта тахсан, көрөөччүлэр сэҥээриилэ­рин ыллылар. Ордук сэргэхтик бэйэлэрин Августина Тихонова, Алена Филиппова, Гульнара Будищева уонна Анна Петрова билиһиннэрдилэр.

Үһүс түһүмэххэ кыттааччылар бэйэлэрин бырайыактарын кө­мүс­кээтилэр. Зоя Максимова Наахара нэһилиэгэр саҥа микрооройуону тутуу туһунан кэпсээтэ. Онтон Тэҥкэт­тэн Анна Петрова тыа хаһаайыс­тыбатыгар кэпэрээссийэлэһэн үлэлээһин туһунан бырайыагын билиһиннэрдэ. Ньургуйаана Фе­дорова тэрилтэлэргэ хайдах уоту харыстаан туттар туһунан кэпсээтэ, холобурдаата. Гульна­ра Будищева оҕолору кыра саас­та­рыттан бэрээдэккэ үөрэ­тэр мультипликационнай киинэ­лэри устар былааннааҕын билиһин­нэрдэ.

Бүтэһик түһүмэҕинэн талааны көрдөрүү буолла. Манна ким туох талааннааҕынан бэйэтэ туспа кэнсиэри көрдөрдүлэр. Үгүс ырыа ылланна, үҥкүү үҥкүү­лэннэ.
Кэмниэ-кэнэҕэс түмүгү та­һаарар долгутуулаах түгэн үүннэ. Ким кыайан Граны ылара бу чугаһаата. Кыттааччыларга бары­ларыгар анал ааттар иҥэ­ри­линнилэр. Улахан киирсии кэн­ниттэн үһүс бочуоттаах миэс­тэҕэ Элгээйиттэн Алена Филип­пова, иккис миэстэҕэ Нааха­раттан Зоя Максимова таҕыс­тылар. Онтон муҥутуур кыайыы­лаа­ҕынан уонна улуус баһылыгын 50 тыһ. солк. суумалаах Гранын хаһаайкатынан улуус дьаһалтатын исписэлииһэ Гульнара Будищева буолла. Ки­ниэхэ наҕарааданы улуус баһы­лыгын экэниэмикэҕэ солбу­йааччы Максим Прокопьев туттарда.

Сунтаарга биллэриллибит Тыа сирин үлэһиттэрин сы­лыгар сүүрбэ биэс идэтигэр бастыҥ көрдөрүүлээх үлэһит улуус баһылыгын гранын тутуохтаах. Ааспыт нэдиэлэҕэ олохтоох полиция бастыҥ сотруднига билиннэ. 

---

Алтынньы ыйтан Ис дьыала отделын иһинэн хас биирдии салааттан аҕыс бастыҥ көрдөрүүлээх полиция үлэһиттэрэ талыллан, күүс-уох туругар, сокуону би­лиигэ тургутууну ааспыттар. Онтон биэс чаҕылхайдара талыллан, иккис түһүмэххэ кии­рэн, дьоҥ­ҥо-сэргэҕэ бэйэлэрин үлэлэрин билиһин­нэр­дилэр, байыаннай түһүмэххэ бэстилиэти ыстылар-хомуй­дулар, экипировкаларын таҥын­нылар, талба талааннарын көр­дөрдүлэр.

Виктор Иванов – ИВС үлэһитэ, полиция младшай сер­жана. Бу соторутааҕыта үлэлии кэлбит диэтэххэ, үлэтин көрдө­рүүтэ, бэриниитэ тута харахха быраҕыллар. Бэйэтин билиһин­нэ­риитигэр дьиэ кэргэнинээн сахалыы таҥнан тахсан, бу идэҕэ сыал туруорунан үлэлии-хамсыы сылдьарын эттэ, талааныгар гитаранан ыллаан элбэх дьон кутун тутта.

Иван Афанасьев – штаб иниспиэктэрэ, полиция млад­шай лейтенана. Кумааҕы, дьыала үлэтин баһылаан, полиция үлэтин отчуотун оҥорууга бастыҥа би­линнэ. Иван көрөөччүнү асчыты­нан сөхтөрдө. Ас астаабыт ыры­сыабын, буһарыы­тын барытын видеонан көрдө­рөн, дьүүллүүр сүбэҕэ амсаппыта бэйэтэ туспа суолталаах түгэн буолла.

Никита Данилов – ДПС иниспиэктэрэ, полиция лейтенана. Суол-иис быраабылатын кэһии­гэ, буруйу кэһээччилэри кытта күннэтэ суолга туран үлэлиирин туһунан видеонан көрдөрөн үлэтин билиһиннэрдэ. Талба талаа­ныгар ырыа бэлэх уунна.

Петр Горохов – экэнэмии­чэскэй буруйу кэһиини утары үлэ­лиир полиция үлэһитэ, полиция хапытаана. Бииргэ үлэлиир үөлээннээхтэрин кытта үлэлэрин сүрүн тутулун видеонан көрдөрдүлэр. Хайдах бу идэҕэ үлэлии кэлбитин туһунан бэркэ кэпсээн, талааныгар «Көмүс далбарым» диэн ырыаны бэлэх уунна.

Оттон бастыҥ ааты ылбыт Ва­силий Пахомов – Сунтаар нэһилиэгин участковай-боломуочуйалааҕа, полиция хапытаа­на. Бэйэни билиһиннэриитигэр үс оҕотунаан, кэрэ аҥарын Анналыын сахалыы сайбаччы таҥнан тахсан бэйэлэрин билиһиннэрдилэр. Байыаннай түһү­мэххэ барытын 15 сөкүүндэ иһи­гэр толору оҥорон барыларын кэннигэр хаалларда. Талааныгар икки оҕотунаан уонна кэргэ­нинээн вальс үҥкүүлээн дьону үөртэ.

Бары бастыҥ үлэһит эрэ буолбакка, дьиэ кэргэн бастыҥ аҕа баһылыктара буолалларыттан уонна талба талааннаахтарыттан сөхтүбүт.