Метка: Тыа сирин тупсаран оҥоруу

Соморсуҥҥа “Дьол биһигэ” сквер тутулунна

Күн уотугар күлүмүрдүү оонньуур уу бытархайдарын ыһар фонтан, “Мин ийэбин таптыыбын”, “Соморсун нэһилиэгин уон оҕолоох — сулустаах ийэлэрэ”, “Ыал — олох төрдө. Соморсун нэһилиэгин ытык ыаллара” стелалар тула дьэрэкээн сибэккилэр, сынньалаҥ ыскаамыйалар, кыраһыабай билиитэлэринэн тэлгэммит тротуар, оҕо оонньуур хачыаллара, кэнсиэртиир сир. Бу барыта “Дьол биһигэ” диэн ураты сылаас тыынынан илгийэр ааттаах сквер иһигэр олохтоохтук чочуллан оҥоһуллубут. 

Сквергэ ийэ мөссүөнүн аннынан соморсуннар биир дойдулаахтара, аммалар киэн туттуубут Ольга Иванова-Сидоркевич “Таптыаҕыҥ ийэни” диэн дууһаны долгутар, саха дьонун уоһуттан түһэрбэккэ таптаан ыллыыр ырыатын тыллара суруллубуттар. Бу курдук тупсаҕайдык тутан, ис сүрэхтэрин ууран туран соморсуннар бэртээхэй диэн сквери үлэҕэ киллэрдилэр.

Сулустаах ийэлэр, эн-мин дэһэн дьоллоохтук олорор ытык ыаллар, элбэх оҕолоох ийэлэр, үстэн элбэх оҕолоох аҕалар, быйыл бастакы кылааска киирбит үөрэнээччилэр, кырачаан оҕо саадын иитиллээччилэрэ бары биир-биир сквер киин аанынан киирбиттэрэ көрөргө олус үчүгэй.

“Мин бэйэм 87 саастаахпын. 11 оҕолоохпун уонна 7 тулаайаҕы ииппитим. Билигин куоракка олоробун, 27 сиэннээхпин, 15 хос сиэннээхпин. Үлэлээбит, олорбут нэһилиэгим сайдан тупсан иһэриттэн олус үөрэбин”, — диэн бэйэтин санаатын Герой ийэ Н.П. Васильева үллэһиннэ. Надежда Петровнаҕа бу күн “Саха сирэ Россия састаабыгар киирбитэ 375 сыла” диэн Бэлиэни улуус баһылыга Николай Архипов туттарда.

Нэһилиэк дьаһалтата ылбыт Гранын сөптөөхтүк туһанан, харахха быраҕыллар тутууну ыыппытын Граннары биэриигэ республика таһымыгар быһаччы үлэлэһэр специалист С.А. Константинов бар дьон ортотугар бэлиэтээтэ.

“2015 сылтан ыла иитиэхтэн илдьэ сылдьар баҕа санаабытын олоххо киллэрдибит. Республикабыт тыатын хаһаайыстыбатын иһинэн “Тыа сирин территорияларын туруктаахтык сайыннарыы” диэн тус сыаллаах федеральнай Программатын Граныгар киирсэн кыайаммыт, бу сквербит олоххо киирдэ. Граммыт 1 мөл. 200 тыһ. солкуобай этэ гынан баран, үп-харчы кырыымчыгынан, 700 000 солкуобай бэриллибитэ. Ону олохтоох дьаһалтабыт эбии үбүлээн, ону кытта уопсастыбаннас субуотунньуктаан сквербитин үлэҕэ киирэн, махталбыт муҥура суох. Инникитин элбэх былаан баар. Оҕолор оонньуур былаһааккаларыгар оҥоһуктар элбиэхтэрэ, сибэкки, мас олордуохпут”, -диэн нэһилиэккэ “Россия ийэлэрэ” уопсастыбаннай хамсааһын куратора М.А. Кононова эттэ.

Улуус олоҕо: Ытык Күөл ыала Кириллиннэр тиэргэннэрин тохтоло суох киэргэтэллэр

Таатта улууһугар быйыл – Ыал сыла. Онон сиэттэрэн, Ытык Күөл сэлиэнньэтигэр олорор түөрт оҕолоох Ньургустаана уонна Сергей Кириллиннэри «Улуус олоҕо» бырайыак чэрчитинэн «Улуус Пааспарыгар» билиһиннэрэбин. Эрдэттэн сэрэтэбин: кэпсэтээччилэрим кэмчи саҥалаахтар, онон ситэ эппэтэхтэрин хаартыскалар ситэриэхтэрэ.

Ыал ийэтэ Ньургустаана Петровна балыыһаҕа терапия отделениетыгар санитаркалыыр. Оттон Сергей Георгиевич бухгалтер идэтин ылбыт гынан баран, ИП тэринэн ыалларга сантехниканы уонна сайыҥҥы уу ситимин тардан биэрэр, кыһын сакаас аҕыйах кэмигэр тутууга үлэлиир. Кириллиннэр түөрт оҕолоохтор. Икки улаханнара Дьокуускайга үлэлииллэр: кыыс – медик, ожоговайга сиэстэрэлиир, уол – тутууга сылдьар. Икки кыралара – алта уонна түөрт саастаах кыргыттар.

Биэс сыллааҕыта улуус киинигэр дьиэлээх, 15 суотайдаах учаастагы атыыласпыттар. Сергей дьиэтин эркинин тас өттүттэн изовер хаттыктаан, ОСВ-нан бүрүйбүт уонна, биллэн турар, толору хааччыллыылаах гына оҥостубут. Тыа ыалын сиэринэн сайын куурусса иитэр буоланнар, күн аайы сымыыт киирэ турар. Куруолук ииттээри тэриммиттэрэ табыллыбатах: тыһы куруолуктарын ыт туппут, инньэ гынан тулаайахсыйбыт атыыр соҕотоҕун эргичиҥнии сылдьар.

Тэлгэһэҕэ оҕурсу, помидор үүннэрэллэр. “Кэлин оҕуруоттааҕар сибэккигэ ордук оҕуттум”, — диир ыал ийэтэ. Ол тоҕотун Ньургустаана Петровналаах кылгас кэпсээннэриттэн тута сэрэйдим. Кинилэр былырыын “Тупсаҕай оҥоһуулаах тиэргэн” куонкуруска кыттан, үһүс миэстэни ылбыттар. Быйыл эмиэ киирсэ сылдьаллар. Маны элбэх оҕолоох ыаллар кииннэрин үлэлэтэр Ионовтар оскуолалара көҕүлээн тэрийэр эбит.

Уһаайба штакетнигыттан саҕалаан ыал аҕатын уус тарбаҕынан айыллыбыт-тутуллубут. Сергей иллэрээ сылтан саҕалаан кыргыттарыгар оонньуур дьиэ туппут уонна араас кыыллары мастан уһанан оҥорбут. Оҕолоро сайын сөтүөлээн сөрүүккүүллэригэр улахан бассейн атыылаһан туруорбуттар. Аллара аһаҕас туран уулусса буоруттан киртийэрин иһин, үрдэтэн уонна үрүттээн оҥорбуттар. “Иккиэн сүбэлэһэн, былааннаан оҥостобут. Идиэйэ эрэ наада”, — диир хаһаайын.