Алкивиад Иванов сырдык аатыгар сүгүрүйэн

496

Сунтаарга А.Иванов аатынан олимпийскай эрэллэри бэлэмниир оҕо спортивнай оскуолата төрүттэммитэ 10 сылын уонна медицинэҕэ наука дуоктара, профессор, Арассыыйа медицинэҕэ наукаларын академиятын Саха сиринээҕи научнай киинин төрүттээччи уонна бастакы дириэктэр, СӨ үтүөлээх бырааһа, көҥүл тустууга ССРС спордун маастара, Арассыыйа икки төгүллээх чөмпүйүөнэ, Сунтаар улууһун Бочуоттаах гражданина Алкивиад Исидорович Иванов төрөөбүтэ 75 сылын бэлиэтиир үөрүүлээх тэрээһиннэр икки күн устата өрө көтөҕүллүүлээхтик буоллулар.


Ааһан эрэр сыл бу биир улахан бэлиэ тэрээһинин чэрчитинэн көҥүл тустууга Арассыыйа икки төгүллээх чөмпүйүөнэ Алкивиад Иванов кэриэһигэр өрөспүүбүлүкэтээҕи турнир ахсынньы 24 күнүгэр сарсыарда 10 чаастан спорт манеһыгар буолла. Турнирга 2002-2004 сс. уонна онтон үөһэ с.т. уолаттар 24, 26, 28, 30, 32, 35, 38, 46, 50 уонна 50 кг үөһэ ыйааһыннарга күүстэрин холостулар.

Бу күн күнүс 4 чаастан Олоҥхо дьиэтигэр бэлиэ түгэннэр үөрүүлээх тэрээһиннэрэ бэрт сэргэхтик буолла. «Нам 10 лет» диэн альбом кинигэ сүрэхтэниитэ болҕомтону улаханнык тарта. Тэрийээччилэр улуус спорду сэҥээрээччилэрин, биллиилээх биир дойдулаахпыт А.И. Иванов үтүө, сырдык аатыгар сүгүрүйээччилэри бу дьоһун тэрээһиҥҥэ биир түһүлгэҕэ түмэ тардыбыттара үөрүүлээх буолла.