Биһиги хаһыаппыт анал бирииһигэр сылын аайы ыытыллар сүүрүүгэ күрэхтэһиигэ быйыл тоҕус хамаанда кытынна.
Ол курдук, оҕо саадын холбоһуктаах («Чебурашка», «Кыталык», «Ньургуһун»), лиссиэй, Сунтаар 1 №-дээх оскуолатын, олимпийскай эрэллэри бэлэмниир оҕо анал спортивнай оскуолатын, «Татыйыына» пиирмэ, колледж, киин балыыһа хамаандалара эстэпиэтэҕэ кытыннылар. Татыйыына» икки хамаанданы туруорбута олус кэрэхсэбиллээх, оҕо саадын тэрилтэлэрин эмиэ бэлиэтээн ылар тоҕоостоох. Балыыһа, олимпийскай эрэл оскуолата сылын аайы кыттар, бириистээх миэстэлэргэ тиксэр. Бу да сырыыга, бочуоттаах миэстэлэргэ таҕыстылар. Ол курдук, успуорт оскуолатын үлэһиттэрин хамаандата иккис миэстэни ылла. Онтон балыыһа хамаандата бэрт эрийсиилээхтик, элбэх көрөөччү ыһыытын-хаһыытын ортотугар, иккистээбит хамаандаттан бэрт кыранан хаалан, үһүс буолла. Бастаабыт оҕо саадын хамаандатын аҕыс чилиэнэ «Сунтаар сонуннара» хаһыаты бу сыл иккис аҥаарыгар босхо сурутан ааҕар буоллулар. Бириистээх миэстэлэргэ тахсыбыт хамаандалар улуустааҕы успуорт отделын грамотатынан, мэтээлинэн наҕараадаланнылар.
Куруоска элбэх киһи кытынна. Манна бу күрэхтэһии аны сайын Үөһээ Бүлүүгэ сүүрүүгэ кыттар хамаанда сүүмэрдэнэр буолан, элбэх киһи сүүрдэ. Ол курдук, оскуола үөрэнээччилэриттэн саҕалаан аҕам саастаахтар сүүрүү балаһыанньатынан (кыргыттар, дьахталлар) 3000 м, (уолаттар, эр дьон, бэтэрээннэр) 5000 м илин-кэлин түһүстүлэр.
Кыргыттарга Дайаана Федорова (Кэмпэндээйи, 3 №-дээх оскуолаҕа үөрэнэр) бастакы, Лена Иванова (Сунтаар 1 №-дээх оскуолата) иккис, Күндэлиинэ Ксенофонтова (лиссиэй) үһүс миэстэлэри ыллылар.
Дьахталларга Настя Иванова биэтэккэ соҕотоҕун кэлэн, хаһыаты босхо сурутан ааҕарга купуон хаһаайката буолла. Уолаттарга лиссиэй үөрэнээччитэ Добун Иванов бастаата, Владик Кривошапкин (1 №-дээх оскуола) иккис, Александр Семенов (лиссиэй) үһүс миэстэ буоллулар. Эр дьоҥҥо Арсентий Аргылов бастаата, Анатолий Акимов иккис, Александр Сидоров үһүс миэстэлэргэ таҕыстылар. Оттон бэтэрээннэргэ үс киһи сүүрдэ. Ол курдук Геннадий Пустоляков, Виссарион Спиров уонна Петр Чемборисов. Кинилэр туһааннааҕынан бастакы, иккис, үһүс миэстэлэри ыллылар. Биһиги хаһыаппыт бирииһигэр сылын аайы Виссарион Спиров төһө да тустаах эрчиллиини, дьарыгы барбатар да, мэлдьи, били этэргэ дылы, пуорматыгар сылдьар киһи кэлэн күрэхтэһэр. Саас буолла да, биһигиттэн хаһыаппыт бирииһигэр сүүрүү буолар дуо, бэтэрээннэри сүүрдэр инигит диэн мэлдьи туоһулаһар. Маладьыас. Оттон Петр Чемборисов бэйэтин кэмигэр оройуоҥҥа, өрөспүүбүлүкэҕэ эрэ буолбакка, Арассыыйаҕа тиийэ сүүрбүт аҕай спортсмен буоллаҕа. Бэл, Краснодар куорат стадионугар сүүрэр кэмигэр көрөөччүлэр дохсун хаһыыларынан стадион түллэҥнии олорор кэмнээх этэ диэн дьон сөҕөн кэпсиир. Геннадий Пустоляков эмиэ быһый атахтааҕынан биллибит спортсмен. Бэтэрээн сүүрүктэрбитигэр ытыктабыл, хайҕабыл буоллун.
Куруоска бириистээх миэстэлэргэ тахсыбыттар эмиэ сыл иккис аҥаарыгар улуустарын хаһыатын босхо сурутан ааҕалларыгар купуон туттарылынна. Улуус успуордун отделын грамоталарынан, мэтээллэринэн бэлиэтэннилэр.
Күрэхтэһии кылаабынай судьуйатынан Анатолий Осипов, судьуйаларынан Таисия Ксенофонтова, Александр Оконешников үлэлээтилэр. «Урожай» уопсастыба бэрэссэдээтэлэ Дмитрий Спиридонов кэмэнтээтэрдээн, күрэхтэһиини олус киэргэттэ.