Таатта улууһун Дьохсоҕон нэһилиэгэр А.К.Андреев аатынан «Сырал тулааһына» балаҕаҥҥа бэрт сэргэх тэрээһин буолла. Бу күн нэһилиэк коллекционердара быыстапкалаатылар. Дьону-сэргэни сэргэхсиппит тэрээһин туһунан нэһилиэк бибилэтиэкэрэ Галина Другина иһитиннэрдэ.
—Бу быыстапканы нэһилиэк почтатын үлэһитэ, интэриэстэринэн түмсүүлэри иилиир-саҕалыыр Вера Харайданова тэрийдэ. Быйылгы тэрээһиҥҥэ уон коллекционер кытынна. Дьикти дьарыктаахтар бу сырыыга халандаардары, урукку тимэх, ридикюль, аккырыыкка арааһын, брошьтары, значоктары, вымпеллары, остуолга ууруллар лаампалары, улуустар дьаралыктарын, араас омук банкнотун, былыргы кумааҕы харчылары, манньыаттары, оонньуур аттан саҕалаан олоҥхо, остуоруйа, киэргэлгэ ууруллар дьөһөгөй оҕотугар тиийэ, о.д.а., киһи эрэ сөҕө, хайгыы, кэрэхсии көрөр малын-салын аҕалбыттар. Кинилэр коллекцияларын көрдөрөрү сэргэ, хас биирдиилэрин туһунан киһи эрэ сэргээн истэ туруох интэриэһинэйдик кэпсээбиттэрэ болҕомтону улаханнык тарта. Өссө биир кэрэхсэбиллээҕэ, коллекционердар бу дьарыктарыгар кэнчээри ыччаттарын, оҕолорун, сиэннэрин угуйаллара, урукку малы-салы харыстыы үөрэтэллэрэ-такайаллара, историятын билэргэ-көрөргө уһуйаллара улаханнык үөртэ. Ол курдук, бу тэрээһиҥҥэ алта саастаах Ариана Харайданова, алтыс кылаас үөрэнээччитэ Аннушка Дорофеева, 8 кылааска үөрэнэр Ариан Николаев кыттыыны ылбыттара дьону-сэргэни үөртэ, — диир Галина Николаевна.
Долгутуулаах умнуллубат күн коллекционердар бэрт элбэҕи былааннаабыттар. Түмсүүлэригэр өссө элбэх киһини тардарга, мунньар малларын-салларын хаҥатарга, хайысхатын элбэтэргэ, улуустааҕы, өрөспүүбүлүкэтээҕи тэрээһиннэргэ көхтөөхтүк кыттарга, биир интэриэстээхтэрин көрсөн санааларын атастаһарга, о.д.а. элбэҕи сүбэлэспиттэр.
Тэрээһин түмүгүнэн дьүүллүүр сүбэ аатыттан быыстапка кыттыылаахтарыгар «Баай коллекция», «Сэдэх коллекция», «Дьикти лаампалар», «Кэрэни кэрэхсээччи», «Билиини хаҥатааччы», «Кэскиллээх коллекционер», «Саҥа саҕалааччы», «Дьэрэкээн коллекция», «Кэм кэрдиис кэрэһитэ» «Саамай эдэр коллекционер» диэн анал ааттар, туоһу суруктар, өйдөбүнньүк бэлэхтэр туттарыллыбыттар.
Нэһилиэк олохтоохторо тэрээһинтэн улаханнык сэргэхсийбиттэр. Оҕо сааспытын санатта диэн махтанааччылар элбээбиттэр. Онтон сорохтор бу бэртээхэй түмсүүгэ кыттыһар баҕалаахтарын биллэрбиттэр.