Былыр сымса туттуу-хаптыы, кыраҕы харах, холку быһыы-майгы, туохха барытыгар дьоҕур, инникини ырыҥалыыр мындыр толкуй бэркэ сыаналанара. Онтон хабылык, хаамыска тарбаҕы сайыннарар, тулууру, сымсаны эрчийэр буоланнар, саха дьоно-сэргэтэ, оҕо-аймах бэркэ сөбүлээн оонньуура. Олунньуга Ийэ тыл декадатыгар туһаайан Саккырыыр орто оскуолатын саха тылыгар учууталлара, оҕо-аймах спорка оскуолатын үлэһиттэрэ хаамыска, хабылык күрэхтэһиитин тэрийэн ыыттылар.
Бу өбүгэлэртэн кэлбит сүрдээх хатыһыылаах оонньууга оҕолор, учууталлар, саастаах дьон бары көхтөөхтүк кытыннылар. Күрэс сүрүн сыалынан сахалыы остуол оонньууларын үйэтитии, сайыннарыы буолар.
Оҕону кыра эрдэҕиттэн хаамыска, хабылык оонньууларыгар үөрэттэххэ, угуйдахха оҕо эргиччи сайдарыгар, эт-хаан өттүнэн эрэ буолбакка, толкуйдуур, өйүгэр тутар дьоҕура күүскэ сайдарыгар көмөлөөҕө науканан дакаастаммыта. Онон саастаах дьону тэҥэ оҕолор, ыччаттар ортолоругар бу оонньуу тарҕанан, өссө киэҥ эйгэни хабан эрэрэ үөрдэр.
Улууспут киинигэр Ийэ тыл, сурук-бичик күнүн декадата киэҥ далааһыннаахтык бэлиэтэнэ турар. Ол курдук, бу күн чэрчитинэн оскуолаларга араас теманы хабар тэрээһиннэр, тэрилтэлэринэн өбүгэ маанылаах сандалы аһыгар, талба таҥаһыгар куонкурустар о.д.а. олус сэргэхтик ыытылыннылар.
Сахалыы сиэринэн, эбээннии үгэһинэн
Олунньу 16 күнүгэр «Гарпан» этно-култуура киинигэр саха, эбээн тылын уонна литературатын учууталларын көҕүлээһиннэринэн сахалыы, эбээннии таҥаска, аска-үөлгэ бэрт үчүгэй куонкурус ыытылынна. Манна улууспут тэрилтэлэрэ күргүөмүнэн сахалыы, эбээннии таҥас-сап кэтэн, киэргэнэн-симэнэн кэлэн кытыннылар. Саалаҕа остуол хотойорунан толору саха, эбээн аһа-үөлэ тардыллыбытын көрөн киһи эрэ сүргэтэ көтөҕүллэр, кырдьык да тылбытынан-өспүтүнэн, сиэрбитинэн-туоммутунан, култуурабытынан баай омук эбиппит диэн киэн туттуу санаатын саҕар истиҥ эйгэ түстэннэ.
Улуустааҕы киин балыыһа үлэһиттэрэ
Түгэһиир нэһилиэгин олохтоох дьаһалтата
“Харчаана” уһуйаан кыталык кыргыттара, далбар хотуттара
Мичээринэн сыдьаайар оҕо саас киинэ
Оскуола түмсүүлээх кэллэктиибэ
