Куокунуга Сахаяна Ксенофонтова, Владимир Гаврильев диэн эдэр ыаллар холобурга сылдьаллар. Кинилэр 2005 сыллаахха сүрэхтэринэн сөбүлэһэн, нарын тапталларын µйэтитэн, биир буруоланан алаһа дьиэ тэриммиттэрэ.
Эдэр ыал икки оҕолоноллор. Ол кэмҥэ ыал аҕата Владимир чугас аймаҕын ийэлэрэ күн сириттэн баран, тулаайах хаалбыт 9-с кылааска үөрэнэр Күннэйи, 6-с кылааска үөрэнэр Юраны бэйэлэригэр иитэ ылаллар. Ити 2012 сыллаахха. Онон биирдэ түөрт оҕолоно түһэллэр.
Оҕолор саҥа ыалга киирээт, Сахаяналаах Владимиры «ийээ», «аҕаа» диэн ыҥыраллар. Бу элбэҕи этэр. Эдэр дьон кинилэргэ, чугас дьонун эмискэ сүтэрбит оҕолорго, ийэлии-аҕалыы истиҥник, сылаастык сыһыаннаһар буолан, түргэнник ылыммыттара саарбаҕа суох.
Ииппит кыыстара Күннэй билигин Мииринэйдээҕи техническэй колледжка төрдүс кууруска үөрэнэр. Юралара быйыл оскуоланы бүтэрээри сылдьар. Кини олус дьиэмсэх, дьонугар мэлдьи көмөлөһөр. Оскуоланы бүтэрэн, түргэнник идэ ылан, дьонугар көмөлөһөр санаалаах. Тиэхиньикэҕэ сыстаҕас буолан суоппар, мэхээньик буолар баҕалаах. Төрөппүт кыыстара Майя бэһис, уоллара Марик иккис кылааһы бүтэрдилэр.
2014 сыллаахха үһүс оҕолоро Ян күн сирин көрөр. Эдэр ыал ийэтэ олохтоох дьаһалтаҕа үлэлии сылдьан уурайан, оҕолорун иитиинэн дьарыктанар. Оттон эдэр аҕа улахан дьиэ кэргэни иитэргэ, оҕолорун атахтарыгар туруорарга көмө хаһаайыстыбаланнахпытына табыллыыһы диэн санааланан, ынах, сылгы иитиитинэн дьарыктанар. Билигин 20-тэн тахса төбө ынах сүөһүлээхтэр, сыспай сиэллээхтэрэ эмиэ үөрүнэн киэҥ сыһыыларынан сылдьаллар.
Улахаттар сайынын дьонноругар көмөлөһөн окко сылдьаллар, ийэлэригэр дьиэ үлэтигэр илии-атах буолаллар.
Оттон бу былырыын эбии 3 оҕону иитэ ылбыттара. Бу оҕолор олох ыарахаттарын бэрт кыра саастарыттан көрсөн, эрэйдээх, кыһалҕалаах олоҕу бэрт эрдэ билбиттэрэ олус хомолтолоох. Аҕыстаах Яша, алталаах Күннэй уонна биэстээх Сааскылаана бииргэ төрөөбүттэр. Кинилэр атын улуустан манна кэлээхтээбиттэр. Оҕолору олус аһынан, биэс оҕо ийэтэ Сахаяна кэргэнин кытта сүбэлэһэн баран иитэ ылбыттар. Онон эдэр ыал приемнай дьиэ кэргэн диэн буолаллар. Кырачааннар эдэркээн 30 саастаах Сахаянаны, 34 саастаах Владимиры «ийээ», «аҕаа» диэн олус минньигэстик ыІыраллар.
Сахаяна оҕолорун ситиһиилэрин, көрүдьүөстэрин, үөрүүлэрин кэпсииригэр хараҕа мичилийэ олороруттан киһи олус да астынар, маннык кэрэ, сырдык, үтүө сүрэхтээх киһи баар буолан, олох ыарахаттарын тулуйан, инникигэ эрэли оҕолорго сахпыт эбит буоллаҕа диэн. Оттон ыал аҕата Владимир кэргэнин, оҕолорун диэки сылаастык имэрийэ көрө-көрө эмиэ олох-дьаһах туһунан сэмэйдик кэпсиир, инники былааннарын билиһиннэрэр.
Ааспыт нэдиэлэҕэ Арассыыйаҕа Дьиэ кэргэн күнэ бэлиэтэммитэ. Бу бэлиэ күнүнэн улууспутугар араас тэрээһиннэр ыытылыннылар. Ол чэрчитинэн, улуустааҕы эпиэкэ отделын начаалынньыга Оксана Еремеевалыын Куокунуга бу эдэр ыалга тахса сырыттыбыт. Эпиэкэ салайааччыта иитиигэ сылдьар оҕолор олохторун-дьаһахтарын билистэ, төрөппүттэри кытта кэпсэттэ. Аҕыс оҕолоох эдэр ыалга эпиэкэ отдела дьиэ хаһаайкатыгар олус наадалаах тэрили бэлэх туттаран үөртэ. Биһиги хаһыаппыт эрэдээктэрэ Б.П.Николаев быһаарыытынан, бу аһыныгас сүрэхтээх ыалга сыл иккис аҥаарыгар улуустарын хаһыатын босхо сурутан аахтыннар диэн купуон туттарбыппытын, дьиэлээх хаһаайын оҕолорбунаан сайын отуубутугар олорон сонун ааҕыахпыт диэн бэркэ астыммытын биллэрдэ.