Үөһээ Бүлүү улууһун Кэнтигэ сибэккинэн симэнэр

242

Н.К.Седалищев-Дьүөгэ Ааныстыырап аатын сүгэр Кэнтик орто оскуолатын коллектива үбүлүөйдээх 20-с «Манчаары Оонньуулара» спартакиаданы көрсө 12 тыһыынча сибэккини олорто.


Ааспыт сыл күһүнүгэр, оскуола үлэһиттэрэ 10 тыһыынча сибэкки олордор туһунан былаан ылыммыттара. Онуоха хас биирдии кылаас 500-түү, агроном Галина Изосимова 2000-ча, хас биирдии үлэһит 50-нуу сибэкки олордорго сорук туруоруммуттара.

Үһүс сылын оскуолаҕа агрономунан таһаарыылаахтык үлэлии сылдьар Галина Николаевна салалтатынан олунньу ыйтан үүнээйи арааһын үүннэрэн саҕалаабыттара. Киниэхэ олохтоох кыргыттар Алена Дмитриева уонна Татьяна Чыбыкова илии-атах буолан көмөлөһө сылдьаллар. 12 тыһыынча сибэкки арааһын таһынан, оҕуруот аһын эгэлгэтин үүннэрбиттэрин истэн, олус кэрэхсии санаатым.

«Кэнники сылларга нэһилиэкпитигэр сайдыы тэтимнээхтик барар. Тас көстүүбүт күн-түүн тупсан иһэриттэн үөрэбит. Спартакиадаҕа нэһилиэкпитигэр бочуоттаах ыалдьыттар кэлэн түһүөхтэрэ, онон олохтоох дьон үлэтэ-хамнаһа бу тула туһуланар. Икки мэндиэмэннээх таас оскуолабыт сэлиэнньэ хаба ортотугар турарынан, тэлгэһэтэ саамай кэрэ көстүүлээх буолуоҕа. Маны тэҥэ сайыны быһа сибиэһэй оҕуруот аһын дэлэйдик сиэхпит», — диэн оскуола дириэктэрэ Ольга Астанова кэпсиир.