Хаачыстыба – сүрүн көрдөрүү

196

Бу күннэргэ үчүгэй көрдөрүүлээх үлэтинэн-хамнаһынан Сунтаар улууһун хаһыатыгар дөрүн-дөрүн суруллар «Хочо» МУТ дириэктэрин В.П.Илларионовы көрүстүм.


Валерий Петрович идэтинэн төһө да ыксыы-бохсуу сырыттар, эмиэ биир үөрүүлээх сонунун кэпсээтэ.

«Хочо» МУТ оҥорон таһаарар үүт аһа үрдүк хаачыстыбалааҕынан уруккуттан да биллэрэ. Кинилэр өссө 2015 сыллаахха Бүтүн Арассыыйа үрдүнэн ыытыллар куонкуруска «Национальная марка качества» бириэмийэни, 2016 сыллаахха Саха сирин Атыы-эргиэн бырамыысыланнай палаататын «Золотой Меркурий» диэн наҕараадатын ылан тураллар. Аны билигин, Евразийскай Сойуус «Евразийская марка качества» наҕарааданы тутан кэлэктиип үлэһиттэрэ бары сүргэлэрэ улаханнык көтөҕүллүбүт. Маны баҕар сорохтор, ол Москубаҕа хаһан кинилэр дьиҥнээх бородууксуйаларын бэрэбиэркэлээбит, амсайбыт үһүлэр диэхтэрин сөп. Суох, дьэ бу сырыыга Тойбохой «Хочо» МУТ аһа-үөлэ дойду тэбэр сүрэҕэр — Москуба куоракка уонтан эрэ тахса чааһынан тиийбитин Валерий Петрович бэйэтэ даҕаны сөҕө, астына кэпсиир.

Валерий Петрович бэйэтэ урут өр кэмҥэ тиэхиньикэ өттүгэр үлэлээбит буолан, саҥа үлэтигэр бастаан утаа ас-үөл оҥорон таһаарыытын ымпыгын-чымпыгын билбэтин аһаҕастык этэрэ. Кэлин үлэтигэр күүскэ дьирээлэһэн  ылсыытын, киниэхэ улуустааҕы ветуправление үлэһиттэрэ Л.А.Саввинова, А.А.Кривошапкина, М.С.Архипов, Роспотребнадзортан О.Е.Карамзина, М.З.Иванова, С.И.Иванова сүбэлэр-амалара, ыйыылара-кэрдиилэрэ элбэххэ үөрэппитин, бу ситиһиилэр кэлиилэригэр кинилэр оруоллара үрдүгүн уонна биллэн турар, кэлэктиип сыралаах үлэтин түмүгэр маннык үрдүк ситиһии тосхойбутун бэлиэтиир.

Ити курдук, «Хочо» МУТ тэрилтэ үүттэн оҥорон таһаарар бородууксуйалара оҥорон таһаарыы, атыы-эргиэн саамай сүрүн ирдэбилин – хаачыстыбаны кыайа туталлара, мэктиэлииллэрэ махталлаах дьыала. Аны хайа сатанарынан, саатар сайыҥҥы өттүгэр, сорохтор курдук сыана өттүн көрө түһэллэрэ буоллар, дьон махталын өссө ылыа этилэр буоллаҕа…