Тыа сирдэригэр ходуһалары тупсарыы үлэлэрэ күргүөмнээхтик саҕаланан эрэллэр.
Бу күннэргэ Күүкэйгэ, Бүлүүчээҥҥэ, Хордоҕойго сыһыылары, бааһыналары диискэлээһин, дулҕаны күттэрии үлэтэ барыахтаах. Үлэһиттэр онно бэлэмнэнэн күн сололоро суох. Үлэ хаамыытын управление уонна нэһилиэк олохтоох дьаһалталара сүрүннүөхтэрэ. Бэлиэтээн этэллэринэн, кэлэр сылларга маннык үлэлэр атын да нэһилиэктэргэ ыытыллыахтара. Оччоҕо Сунтаар ходуһалара аны аҕыйах сылынан киһи билбэт гына тупсуохтара.
Сунтаар сылгыһыттара сыспай сиэллээҕи дэлэтэр соруктаахтар
Соторутааҕыта өрөспүүбүлүкэбитигэр сылгыны үөрдээн иитиигэ анал сокуон ылыллыбыта. Ол чэрчитинэн кэлэр түөрт сылга өрөспүүбүлүкэҕэ барыта 400 сылгы базата тутуллуохтаах. Онно сүрүн ирдэбил быһыытынан базалар дьон олорор сириттэн тэйиччи буолуохтаахтар.
Сылгыны иитэр хаһаайыстыбалары өйүүр сыалтан СӨ тыатын хаһаайыстыбатын министиэристибэтэ 1 мөл. солк. суумалаах анал Грант олохтообута. Ол Граны ааспыт сылга 20-тэн тахса хаһаайыстыба ылан база туттубута. Быйыл Граны ылыы иккис түһүмэҕэр 50-тан элбэх сылгылаах тэриллиилээх хаһаайыстыбалар эрэ кыттар бырааптаахтар. Ирдэбиллэрэ кытаанах. Ол курдук, Граны ылар иһин киирсэр хаһаайыстыба бырайыага тупсаҕайын таһынан өссө туох даҕаны иэһэ суох буолуохтаах. Сайаапканы биэрэргэ улуус баһылыгын хадаатайыстыбата булгуччулаах. Сайаапканы биэрии болдьоҕо бу дьыл ыам ыйын 15 күнүттэн 23 күнүгэр диэри. Билиҥҥитэ биһиги Сунтаарбыт улууһуттан хас да хаһаайыстыба кыттарга баҕа санаалаахтар.