Таатта Чымынаайытыгар, Бэс Дьарааһын төрөөбүт нэһилиэгэр ийэ тыл күнүгэр аналлаах уонна дэгиттэр талааннаах улуу хомусчут, Үлэ Кыһыл Знамята уордьаннаах, Саха АССР култууратын үтүөлээх үлэһитэ Лука Николаевич Турнин төрөөбүтэ 100 сылынан, кини албан аатыгар сүгүрүйэн өрөспүүбүлүкэ үрдүнэн ыытыллыбыт «Ил-Эйэ дорҕоонун сомоҕолоһуутугар» бүтүн нэһилиэгинэн көхтөөх кыттыыны ыллыбыт. Ол курдук, орто оскуола иһинэн одун ыйыгар анаан ыраастаныы сиэрэ-туома, хомуска күргүөмүнэн оонньооһун ыытылынна.
Салгыы «Айтал» норуот айымньытын дьиэтигэр олохтоох бибилэтиэкэ үлэһитэ Евдокия Белолюбская саха букубаарын олохтообут С.А.Новгородов туһунан киэҥ ис хоһоонноох дакылааты оҥордо, сынньалаҥ киинин дириэктэрэ М.А.Саввина улуу хомусчут Л.Н.Турнин айар үлэтин туһунан сырдатта, олохтоох хомусчуттарбыт М.Р.Федорова, М.Г.Сокольникова ааттара ааттанна. Ол кэннэ, оҕолору хомуска умсугута дьарыктыыр Парасковья Богдокумова салалтатынан, үөрэнээччилэр, нэһилиэк олохтоохторо кыттыылаах хомуһу күргүөмүнэн тардыы биир тэтимнээхтик ааста.
Бу долгутуулаах күн «Сардаана» оҕо саадыгар сарсыардаттан сахалыы таҥнан сайбаарыстылар, бибилэтиэкэр Евдокия Белолюбская ийэ күнүгэр аналлаах букубаарга сыһыаннаах оонньууну ыытта, эбиэт кэннэ хомуска оонньуур оҕолор түмсэн хомуска дьарыктаннылар. Парасковья Кузьминичнаҕа уһуйуллааччылар кыттыһан тэрээһини улаханнык сэргэхситтилэр.
Эбиэттэн киэһэ нэһилиэккэ саха тылын, литературатын учуутала У.А.Хоютанова сахалыы сөпкө суруйууга дьарыктаата. Ол кэннэ 15 киһи суруйууга кыттыыны ылбытыттан, биэһэ биир да сыыһата суох суруйан хайҕаннылар. Маныаха эһиил аны миэстэлэһиини, анал ааттары олохтуурга бибилэтиэкэр Евдокия Валериевна этии киллэрбитин бары биһирээтибит.
