Күндэйэ Васильевтара ахсынньыга Ил Дарханы кытта көрсөр путевка туттулар

307

Күөх Ньурба сиригэр-уотугар, Дьаархан нэһилиэ­гин Үрүҥ Тунах ыһыаҕар «Тыа ыала-2017» көрүү күрэс буолан ааста. Бу күрэскэ Сунтаар улууһун аатын Күн­дэйэ нэһилиэгин олохтоохторо Васильев­тар дьиэ кэргэттэрэ ситиһиилээхтик көмүскээн, кыайыылаах аатын сүгэн үөрэн-көтөн кэллилэр.


Күрэскэ кыттар дьиэ кэргэттэр оҕо иитиитигэр болҕомтону уурууга, оҕону үлэҕэ сыһыарарга, тыа сиригэр толору хааччыллыылах дьиэни туттууга, байылыат тиэргэҥҥэ уо.д.а. тиэмэлэргэ тус-туһунан былаһааккаларга туһааннаах бырайыактары көмүскээтилэр.

Людмила уонна Владис­лав Васильевтар түөрт оҕолорун кытары бэйэ дьыаланы тэриниигэ, дьиэ кэргэҥ­ҥэ эбии дохуоту киллэриигэ бы­райыактара дьүүллүүр сүбэ биһирэбилин ылан, күрэс түмүгүнэн I миэстэни эрэл­лээхтик ыллылар.

Васильевтар туһунан кэпсиир буоллах­ха, кинилэр тыа сирин ыалын сиэринэн сүөһүлээхтэр, оҕуруот аһын хото үүннэ­рэллэр, сир аһыгар, булка-алка сөбүлээн сылдьаллар. Алта оҕоттон түөрдэ туйгун үөрэнээччи, иккитэ оҕо саадын иитиллээччилэрэ. Улахан уоллара Айаал быйыл Күндэйэ орто оскуолатын туйгуннук үөрэнэн, кыһыл көмүс мэтээллээх бүтэрдэ. Владислав Валерьевич оҕолорун тыа сирин олоҕор-дьаһаҕар, үлэҕэ сыстаҕас буоларга, булт-алт албастарыгар үөрэтэр.

Бу «Тыа ыала» көрүү күрэс түмүгүнэн кыа­йыылаах буолбут Васильевтар дьиэ кэргэн аны кыһын ахсынньыга Дьокуускайга өрөспүүбүлүкэ таһымыгар күрэстэһэ ба­рарга, СӨ Ил Дарханын кытары көрсөргө путевка ыллылар.