СӨ Бырабыыталыстыбатын отчуота Кировскайга үрдүк тэрээһиннээхтик ыытылынна. Отчуот иннинэ олохтоохтор туһааннаах салайааччылары кытта көрсөн, сэҥээрэр ыйытыыларыгар хоруй, сүбэ-ама ыллылар.
Отчуоту СӨ Баай-дуол, сир сыһыаннаһыытыгар миниистирэ Е.В. Григорьева салайан ыытта, сүрүн дакылааты иһитиннэрдэ. СӨ Бырабыыталыстыбатын отчуотугар Промышленность уонна геология министиэристибэтин департаменын салайааччытын эбээһинэһин толорооччу А.Е.Портнягин, СӨ Үп миниистирин солбуйааччы О.П.Никонова, тыа хаһаайыстыбатын, аска-үөлгэ политикатын министиэристибэтин кылаабынай исписэлииһэ И.К.Сивцев, сыана политикатын государственнай кэмитиэтин отделын салайааччы Е.А. Фаизова о.д.а кытыннылар.
Ааспыт сылга отчуокка гаас киириитин тула үгүс боппуруос көтөҕүллүбүтэ. 2016 с. балаҕан ыйын 8 күнүгэр Ил Дархан Е.А.Борисов кыттыылаах Күөрэлээх — Аһыма гаас магистралын утаҕын тардыллыытын үөрүүлээх күнэ буолбута. Олохтоохтор инникитин даҕаны гаас олорор социальнай объектарга, олорор дьиэлэргэ киирэрин күүтэллэр.
Кировскайдар үгүс мунаарар ыйытыыларын хото биэрдилэр. А.М.Александрова дьаһалта исписэлииһэ комплекснай кадастровай үлэ федеральнай бырагырааматын өрөспүүбүлүкэҕэ үп-харчы көрүллүө дуо диэн ыйытта. Ону таһынан «Тыа сирин гаастааһын» бырагырааматын чэрчитинэн, 2016 с. магистральнай чааһа үлэҕэ киирбитин этэн туран, тоҕо иккис пусковой учаастак үбүлээһинэ СӨ тыа хаһаайыстыбатын, аска-үөлгэ политикатын министиэристибэтигэр көспүтүн туоһуласта, 1 гектар босхо сири ылыыга интэриниэт бытаана кыһалҕаны үөскэтэрин, бензин, сэлээркэ, ас-үөл сыаната ыарыы турарын эттэ.
Биэнсийэлээх К.А.Владимиров Араадьыйаҕа Россия биэриилэрэ иһиллибэт буолбуттара үс сыл буолбутун, долгунун тоҕо хаппатын, телевидение биэриитигэр Саха сирэ, «Бэрдьигэс» ТВ көстүбэттэрин эттэ, тоҕотун туоһуласта. Өртөөһүҥҥэ хааччахтааһыны сыыһанан ааҕарын иһитиннэрдэ, тус санаатын тиэртэ. Биир гектар сири ылыы туһалааҕын дуу, суоҕун чуолкайдаһан баран, сир ылаары гыммыта, сабыылаах зона диэн көстүбүтүн эттэ. Сыл ахсын тыа хаһаайыстыбатын көрдөрүүтэ намтаан иһэрин этэн туран, сүөһүнү атыылаһыы төһө суолталааҕын сураста.
Биэнсийэлээх Д.М.Павлова өрөспүүбүлүкэҕэ орто хамнас, биэнсийэлээх төһөнү ылыахтааҕын туһунан ыйытта. Саха сылгыларын киһи биир күрүөҕэ тутара табыллыбат диэтэ. Федеральнай суолга олороллорун быһыытынан, суоппардар буруйдарыттан сүөһүгэ, сылгыга оһол таҕыстаҕына, сүөһүлээх-сылгылаах киһи буруйдаах буолар. Үрдүк үөрэхтээх ыччаттар үлэтэ суох сылдьалларын, үлэ булар уустугун эттэ. Суут-сокуон үлэһиттэрэ, судьуйалар, борокуруордар нэһилиэнньэни кытта көрсөллөрө буоллар диэн баҕа санаатын тиэртэ.
«Одуванчик» оҕо саадын сэбиэдиссэйэ Д.Я.Парникова саҥа оҕо саадын тутуутун туруоруста. Социальнай объектар тымныыларын бэлиэтээтэ, ситимнэргэ өрөмүөн ыытыллара ирдэнэрин ыйда. Онтон бааһынай хаһаайыстыбалаах Н.И. Алексеев сир оҥоруу боппуруоһун көтөхтө.
Евгения Васильевна нэһилиэк олохтоохторо СӨ Бырабыыталыстыбатын отчуотугар көхтөөхтүк кыттыбыттарыгар махтанна. Нэһилиэнньэ туруорсубут ыйытыыларын учуоттаан, күөх төлөн ситимин тардыы үлэтэ былааннаахтык салҕанарыгар, интэриниэт, өртөөһүн, комплекснай кадастровай үлэ, ОДьКХ, сири оҥоруу боппуруостарын боротокуолга киллэрэн үлэлэһиэх буолан эрэннэрдэ. Оҕо саадын тутуутун боппуруоһун СӨ үөрэх уонна наука министиэристибэтигэр тиэрдиэх буолла.
Олохтоохтор үгүс мунаарар ыйытыктарыгар сүбэ-ама, хоруй ыллылар. СӨ Быраабыталыстыбатын отчуотун «үчүгэйинэн» сыаналаатылар.