Оскуола үөрэнээччилэрэ төрөөбүт нэһилиэктэрин ыраастааһыҥҥа туруммуттара биһигини, олохтоохтору, улаханнык үөрдэр.
Ааспыт нэдиэлэҕэ Сунтаардааҕы В.Г.Павлов аатынан алын сүһүөх оскуолатын 4-с кылаастарын үөрэнээччилэрэ (кылаас салайааччылара Иванова Л.М., Трофимова Д.В., Алексеева А.Т., Михайлова Т.Д., Новикова Г.В.) быйыл Арассыыйаҕа биллэриллибит Экология сылын чэрчитинэн, Сунтаарбыт сэлиэнньэтин биир саамай мустан сынньанар сирбитин – Г.Н. Саввинов аатынан үрүҥ тунах ыһыах ыһыллар пааркатын бөҕүн-саҕын хомуйдулар, ыраастаатылар. Онон оҕолорбут Сунтаарбыт кэрэ көстүүлэнэригэр, тупсарыгар бэйэлэрин сэмэй кылааттарын киллэрдилэр. Инникитин да маннык бары бииргэ Сунтаарбыт ырааһырыытыгар сэмэй кылааппытын киллэриэҕиҥ.
