Олунньу 27 күнүгэр СӨ ситэриилээх былааһын уорганнарын 2016 сыллааҕы үлэтин отчуоттуу Бырабыыталыстыба бөлөҕө Орто Халыма улууһугар кэллэ. Субу күн икки бөлөх Байды нэһилиэгэр тахсан нэһилиэнньэни кытта көрсүстэ.
СӨ Үпкэ миниистирин бастакы солбуйааччы Майя Андреевна Данилова, Архитектура уонна тутуу комплексын миниистирин бастакы солбуйааччы Павел Анатольевич Аргунов, Тыа хаһаайыстыбатын уонна аска-үөлгэ бэлиитикэтин миниистирин солбуйааччы Афанасий Михайлович Семёнов, Инвестиционнай сайдыыга уонна предпринимательствоҕа миниистирин солбуйааччы Александр Николаевич Андросов, «ОДьКХ» ГУП кылаабынай энергетигин солбуйааччы Иван Иванович Левин, Доруобуйа харыстабылын министиэристибэтин департаменын салайааччыта Дьулустан Анатольевич Чичахов, Сыана бэлиитикэтигэр Судаарыстыбаннай кэмитиэт Александра Влдаимировна Колесова, «Автомобильнай суоллар управлениелара» ГКУ генеральнай дириэктэрэ Николай Титович Сивцев, Нэһилиэнньэ сэрэхтээх буолуутун хааччыйар Судаарыстыбаннай кэмитиэт департаменын салайааччыта Христофор Семёнович Бурцев, Баайга-дуолга уонна сир сыһыаннаһыыларыгар министиэристибэ департаменын салайааччыта Николай Андреевич Бурнашов уонна Дьокуускайдааҕы айылҕа харыстабылын кэмитиэтин салайааччыта Кирилл Евгеньевич Алчин сырыттылар.
Улуус аатыттан бөлөҕү баһылыгы социальнай боппуруостарга солбуйааччы Светлана Алексеевна Третьякова салайан илдьэ сырытта.
Мунньах буолуон иннинэ биирдиилээн дьон туһааннаах министиэристибэлэр, биэдэмистибэлэр бэрэстэбиитэллэрин кытта сирэй көрсөн олорон тус боппуруостарынан кэпсэттилэр. Ол иһин уопсай мунньах кэмигэр улахан ыйытыылар киирбэтилэр.
Нэһилиэк баһылыга Василий Петрович Оконешников нэһилиэгин иннигэр тыын суолталаах боппуруостарын туруорда. Ол курдук нэһилиэк үрдүнэн биир эрэ ДТ тыраахтыр баарын, ол даҕаны чааһынай бас билии буоларын этэн туран, нэһилиэккэ биир тыраахтыры, ону таһынан ааспыт кыһын киирбит киин хочуолунайга погрузчиктаах МТЗ техниканы туруоруста.
Куораты кытта ситимниир өрөспүүбүлүкэтээҕи таһымнаах суол сылын аайы халаан уутуттан сууралларын, өрөмүөн үлэтэ өтөрүнэн барбатаҕын ыйда уонна маныаха болҕомтону эрэйэрин биллэрдэ.
Соторутааҕыта буолан ааспыт улуус дьаһалтатын отчуотун кэмигэр нэһилиэк олохтоохторо биир кэлим эксээмэни туттарыы аны куоракка буоларын кытта сөбүлэспэттэрин биллэрбиттэрэ. Маныаха Бырабыыталыстыбаҕа туруорсаарыҥ диэн хоруй бэриллибитэ. Онон бүгүҥҥү көрсүһүүгэ бастакынан бу боппуруос туруорулунна. Ол эрээри эксээмэни туттарыы пууннарын сарбыйыы өрөспүүбүлүкэҕэ эрэ буолбакка, бүтүн дойду үрдүнэн бара турар бэлиитикэ буоларын туһунан эппиэт бэрилиннэ. Ол да буоллар төрөппүттэр суруктарын туһааннаах министиэристибэҕэ тиэрдиэх буоллулар.
Улуус үрдүнэн өртөөһүн боппуруоһа сытыытык турар. Маныаха Тыа хаһаайыстыбатын миниистирин солбуйааччы Афанасий Михайлович Семёнов сылын аайы федеральнай кииҥҥэ бу боппуруоһу туруорсалларын эттэ. Ол эрээри: «Дойду биир — сокуон барбытыгар биир», — диэн хоруйдуулларын биллэрдэ. Арай, былырыын тыа фондатыгар сэрэтэр үлэ диэнинэн сирэйдэнэн, 22 улуус сайаапкалаабытыттан 8-гар, ол иһигэр биһиги улууспутугар кыралаан өртөөһүн барбытын ыйда. Билигин киинтэн спутнигынан ханна уот турбутун сонно тута кэтии олорор буоланнар, кистиир кыаллыбат.
Былырыын нэһилиэккэ 26 дьиэҕэ итии киирбит, эбии 14 дьиэ холбоноро хаалбыт. Ол эрээри 4 дьиэ кытыы турар буолан, киин трассаттан олус тэйиэс диэтилэр. Бу уулусса ыаллара улуус иннигэр туруорсубуттара, билигин Бырабыыталыстыбаҕа этиннилэр. Кырдьык, киин уулуссаттан тэйиччитинэн, быйыл матырыйаал тиийбэтэҕинэ, эһиилгигэ диэри уһаан бириэххэ сөп диэн хоруй бэрилиннэ.
ОДьКХ ГУП бэрэстэбиитэлэ Иван Иванович Левин нэһилиэккэ киин трасса тардыллыытын үбүлээһинэ ГУП уонна олохтоох дьаһалта бюджеттарыттан уйунулларын быһааран биэрдэ. Быйылгы үбүлээһин кээмэйэ нэһилиэнньэни бүтүннүү хабарыгар эппиэттэспэт.
Мунньах түмүгэр этинии киирбэтэ, нэһилиэнньэ Бырабыыталыстыба сыллааҕы үлэтин биһириирин биллэрдэ.