Сунтаар улууһугар Тыа сирин үлэһиттэрин сыла биллэриллибитэ. Онон сыл устата араас эйгэҕэ үлэлиир идэлэригэр бастыҥнар талыллыахтара. Ааспыт нэдиэлэҕэ эмп үлэһиттэрин күннэрин көрсө «Тыа сирин бастыҥ биэлсэрэ» куонкурус «Партизан» култуура киинигэр буола ааста.
Сыл чэрчитинэн барыта 25 бастыҥ үлэһит талыллыахтаах. Бэлиэр парихмакер, биэкэр, сылгыһыт, култуура, ас-үөл эйгэтин, социальнай харалта бастыҥнарын талар күрэстэр буолбуттара.
Бастыҥ биэлсэри быһаарыыга улууспут нэһилиэктэрин фельдшерскай-акушерскай пууннарыттан, учаастактааҕы балыыһаларыттан, киин балыыһа отделениеларыттан 10 үлэһит кииристэ.
Түөрт түһүмэх бэрилиннэ. Бастаан бэйэни, талбыт үлэлэрин туһунан билиһиннэрдилэр. Онтон биэлсэр биир идэлээҕэр сыһыаныттан саҕалаан таҥаһыгар-сабыгар тиийэ, ыарыһаҕы кытары кэпсэтииттэн саҕалаан бастакы көмөнү хайдах оҥорууга тиийэ ыйытыыларга хоруйдаатылар. Күрэс үһүс түһүмэҕэр биэлсэрдэр чөл олоххо аналлаах «Я здоровье берегу, сам себе я помогу» диэн мини-сыаҥка кҕрдҕрдүлэр. Кыттааччылар биир-биир тахсан дьону туһалаах аска, успуордунан дьарыктаныыга, доруобуйаҕа буортулаах астан, арыгыттан, табахтан аккаастанарга ыҥырдылар. Үрүҥ халааттаах аанньалларбыт айар-тутар дьоҕурдарын көрдөрүүнэн түһүмэхтэри түмүктээтилэр. Улуус кылаабынай бырааһа Светлана Иванова этэринэн, бу түһүмэххэ урукку өттүгэр биллэ-көстө илик талааннар арыллыбыттар. Ол курдук, Аллыҥа ФАП-ун биэлсэрэ Диана Каплина имигэс үҥкүүһүт, суһал көмө биэлсэрэ Татьяна Аммосова талааннаах ырыаһыт, Толоонтон Зинаида Громова бэлэм артыыс, Түбэйтэн Анна Иванова тойуксут буоларын сонургуу көрдүлэр-иһиттилэр.
Түмүккэ Маар Күөл ФАП-ун биэлсэрэ Василена Менякова «За волю к победе», Туойдаах ФАП-ун биэлсэрэ Ульяна Ераскумова «За добросовестный труд», Кутана учаастактааҕы балыыһатын биэлсэрэ Мария Алексеева «Признательность и уважение», сэллик диспансерын лаборант-биэлсэрэ Лидия Прокопьева «Верность к профессии», Бордоҥ учаастактааҕы балыыһатын биэлсэрэ Евгений Винокуров «Целеустремленность и трудолюбие», суһал көмө биэлсэрэ Татьяна Аммосова «За профессионализм» номинация хаһаайыттарынан буоллулар.
I миэстэни Куокуну ФАП-ун биэлсэрэ Нина Степанова ылан принтеринэн наҕараадаланна. II миэстэни уонна 5000 солк. Толоон ФАП-ун биэлсэрэ Зинаида Громова, III миэстэни уонна 3000 солк. Аллыҥа ФАП-ун биэлсэрэ Диана Каплина ыллылар. Оттон «Тыа сирин бастыҥ биэлсэрэ-2017» анал ааты Түбэй ФАП-ун биэлсэрэ Анна Иванова ылан 50000 солк. суумалаах сэртипикэтинэн бэлиэтэннэ.