Ыам ыйын 15 кµнµгэр Аан дойдуга Дьиэ кэргэн күнэ бэлиэтэнэригэр сөп түбэһиннэрэн, Сунтаар нэһилиэгин дьаһалтата уонна Сунтаардааҕы оҕо дьоҕурун сайыннарар киин тэрийиилэринэн, үгэскэ кубулуйбут «Сунтаар нэһилиэгин саахыматчыт ыала» күрэхтэһии ыытылынна. Күрэхтэһиигэ Сунтаарбыт нэһилиэгин 12 дьиэ кэргэнэ хамаанда тэринэн саахымат түһүлгэтигэр күөн көрүстүлэр.
Күрэхтэһии сэттэ турга швейцарскай систиэмэнэн ыытылынна. Ол түмүгэр: 3 миэстэҕэ ини-бии Афоня, Уйгулаан Кугасовтар, 2-кэ Федоров Ричард, Кириллин С.С. таҕыстылар. 1-кы миэстэҕэ тиксибит уоллаах аҕаҕа Николай Семенович уонна Уйгулаан Мартыновтарга 2017 сылга Сунтаар саахыматчыт ыала буолалларын туоһулуур Сунтаар нэһилиэгин баһылыга Филиппов Э.Е. туруорбут кубогын уонна бириистэрин үөрүүлээх быһыыга-майгыга туттардылар. Биирдиилээн дуоскаларыгар миэстэлэспит оҕолорго: 1 м. Федоров Ричарка (4 кыл.), 2 м. Мартынов Уйгулааҥҥа (4 кыл.), 3 м. Васильева Илонаҕа (4 кыл.), улахан дьоҥҥо 1 м. Габышева Н.А., 2 м. Родионов Е., 3 м. Мартынов Н.С. дохсун ытыс тыаһыгар доҕуһуоллатан грамоталары туттардылар, мэтээллэри кэтэртилэр.
Күрэхтэһии «Саамай кыра кыттааччыта» диэн анал бириис хаһаайынынан «Сардаана» оҕо саадын иитиллээччитэ, 6 саастаах Иванов Артем буолла. Киниэхэ күүс-көмө буолан бэркэ табыллан оонньообут аймаҕа Константинова А.Д. «Бэтэрээн кыттааччы» анал бириис ананна. «Эрэллээх өйөбүл» бириис 1-кы кылааска үөрэнэр уолун Жаны өйөөн, күрэхтэһии бүтүөр диэри уолун туһугар турууласпыт эдэр ийэҕэ Надия Владимировнаҕа туттарылынна. «Кыайыыга дьулуурун иһин» бириистэри, кыл мүччү бириистээх миэстэҕэ тиксибэккэ хаалбыт, 4-с, 5-с миэстэ буолбут хамаандалар, туһааннааҕынан: уоллаах аҕа Никита, Сергей Альбертович Кононовтар уонна убайын Родионов Егоры кытта хамаанда туруоран оонньообут Иванова Саина ыллылар. Күрэхтэһиигэ кыттыбыт бары ыаллар Сунтаар нэһилиэгин баһылыга Э.Е.Филиппов анал бириистэригэр тиксэн, илии тутуурдаах үөрэн-көтөн тарҕастылар.